काठमाडौं : राजेन्द्र महतो नेपाली राजनीतिमा स्थापित नेता हुन् । मधेश आन्दोलन र सीमान्तकृत समुदायको आवाज उठाएर स्थापित भएपनि पछिल्लो समय शक्तिहीन बनेको देखिन्छन् ।
तर तिनै महतो शक्ति आर्जनको चाहनामा देखिन्छन् । त्यसैको शृङ्खलामा उनले लोकतान्त्रिक समाजवादी पार्टी (लोसपा) मा महन्थ ठाकुरसँग अन्तरसंघर्ष गर्दै पार्टी नै छोडे ।
लोसपा नेपालबाट अलग भएर महतोले गत फागुनमा राष्ट्रिय मुक्ति क्रान्ति गठन गरेका थिए । मंगलबार नयाँ पार्टी नै घोषणा गरे, राष्ट्रिय मुक्ति क्रान्ति नेपाल ।
यसलाई अब निर्वाचन आयोगले मान्यता दिनुपर्ने हुन्छ । नयाँ पार्टी घोषणा गर्न महतोले पत्रकार सम्मेलन गरेका थिए । त्यसक्रममा उनले कात्तिक पहिलो साता पार्टी निर्वाचन आयोगमा दर्ता गराउने तयारी रहेको जानकारी दिए ।
राष्ट्रिय मुक्ति क्रान्ति मार्फत् एकल राष्ट्रिय राज्य नेपाललाई बहुल राष्ट्रिय राज्यमा रुपान्तरण गर्ने लक्ष्य राखेका छन् । स्वदेशवाद, बहुलराष्ट्रवाद, सामुदायिक समाजवादको मार्ग निर्देशक सिद्धान्त मार्फत् नेपाललाई बहुल राष्ट्रिय राज्यको रुपमा रुपान्तरणको निमित्त राष्ट्रिय मुक्ति क्रान्तिले अभियानमा निरन्तरता, संघर्षमा जोड र विद्रोहको तयारी गर्ने महतोको उद्घोष छ ।
जनता समाजवादी पार्टी गठन हुँदा नै राजेन्द्र महतोले राष्ट्रिय क्रान्ति मुक्ति अभियान चलाउन उक्त पार्टीमा प्रस्ताव गरेका थिए । तर उपेन्द्र यादवले त्यसलाई अस्विकार गरिदिए ।
पछि जसपा विभाजन भएर लोसपा बन्यो । लोसपामा पनि आफू शक्तिमा जाने र यो अभियान चलाउने उनको प्रयास भयो । असफल भएपछि उनी एक्लै अभियानको तयारीमा जुटे । लोसपिाबाट अलग भएर राष्ट्रिय क्रान्ति अभियानलाई दुई चरणमा चलाए । मंगलबार पार्टी नै घोषण गरे ।
फागुन १४ गते अभियानको घोषणा गरेको दुई दिनपछि काठमाडौँमा उनले प्रदर्शन गरेका थिए । त्यसपछि उनले लगातार प्रदर्शन तथा कार्यक्रमहरू गर्दै आइरहेका छन् ।
राष्ट्रिय क्रान्ति मुक्तिमा यसअघि एक जना मात्र संयोजक थिए अरू सबै साधारण सदस्य थिए । पार्टी घोषणा गर्नु अगाडि पूर्वी कमाण्ड, मध्य कमाण्ड र पश्चिम कमाण्ड भनेर जिम्मेवारी दिइएको थियो ।
पूर्वी कमाण्ड अन्तर्गत कोशी प्रदेशका सबै जिल्ला रहेका छन् । त्यहाँ लिम्बुवान ब्युरो, किराँत ब्युरो गठन गरिएको थियो । मध्य कमाण्ड अन्तर्गत मधेस प्रदेश र बागमती प्रदेश रहेका छन् । यसमा मधेस ब्युरो, नेवाः ब्युरो र तामसालिङ ब्युरो गठन गरिएको थियो । पश्चिम कमाण्ड अन्तर्गत गण्डकी प्रदेश, लुम्बिनी प्रदेश, सदुरपश्चिम प्रदेश र कर्णाली प्रदेश रहेका छन् । त्यसमा थरुहट ब्युरो, मगरात ब्यूरो, तमुवान ब्युरो गठन गरिएको थियो ।
राष्ट्रिय क्रान्ति मुक्ति अन्तर्गत विभिन्न परिषद्हरू पनि गठन गरिएको थियो । परिषद्ले स्वशासन तथा सत्ताको अभ्यास गर्दै आएको थियो । अब त्यसलाई पार्टीको संरचनाभित्र समेटिनेछ ।
देशभर संरचना बनाएर पार्टी घोषणा गरेर महतोले आफू शक्तिमा रहेको भाव छर्ने गरी पार्टी घोषणा गरेका हुन् । महतो विभिन्न दलको नेतृत्व तहमा रहेर चक्कर लगाइरहेका नेतामा पर्छन् । अब आफैँ शक्ति बनाएर उनी राजनीतिक शक्तिमा अडिरहन चाहन्छन् ।
उनले भनेका छन्, ‘पहिले के के भयो भनेर हरेस खाने कुरा भएन । अब हामी सबै एकजुट भएर नयाँ विकल्प दिने गरी अघि बढ्नुपर्छ । हामीले त्यसका लागि आधार तयार गरिसक्यौं, अघि बढिसक्यौं ।’
