रौतहट : अविरल वर्षाले रौतहटको विभिन्न ठाउँमा बकैया र बागमती नदीको बाँध टुटेको छ । बाँध टुटेपछि बाढीको पानी गाउँमा पसेको छ । जिल्लाको माधोपुर, सिंगारमन र धर्मपुर गाउँमा बागमती नदीको बाढी पसेको छ ।
माधोपुरसहित तीन वटै गाउँ बाढीको पानीले जलमग्न भएको छ । २०५० सालभन्दा पनि ठूलो बाढी आएको माधोपुरका स्थानीयहरु बताउँछन् । पानी अझै बढ्दो क्रममा रहेको उनीहरूको भनाइ छ ।
बाढीको पानीले माधोपुरमा २ सय भन्दा बढी घर पूर्ण रूपमा डुबानमा परेको छ, भने अझै कयौं घर डुबानमा पर्ने खतरा बढदै गएको छ । गाउँमा पानी लगातार बढ्दै गएकोले स्थानीयहरु निकै त्रसित भएका छन् । बागमतीमा रौतहटतर्फको बाँध धेरै ठाउँमा भत्किएको छ ।
गढीमाई नगरपालिकाको लक्ष्मीपुर, धर्मपुर र पकाहामा तटबन्ध भत्किएको छ । यसैगरी दुर्गा भगवती गाउँपालिकाको र राजदेवी नगरपालिकाको पनि कटरवनमा बागमतीको तटबन्ध भत्किएको छ । खोलाको पानी मानव बस्तीतिर प्रवेश गरिरहेकाले सचेत र सजग रहन अनुरोध गरिएको छ ।
