हुम्ला : नेपाल टेलिकमको टावर र नेटवर्कले राम्रोसँग काम नगर्दा यसका सेवाग्राही मर्कामा परेका छन् । एक महिनादेखि हिमाली जिल्ला हुम्लाको टेलिकमको टावर र नेटवर्क छिनमा आउने, छिनमा जाने समस्या भएपनि त्यसलाई मर्मत नगर्दा समग्र हुम्ला जिल्लाबासीनै यसबाट प्रत्यक्ष मर्कामा परेका छन् ।
जिल्लामा टेलिकमको टावरले काम नगर्ने, काम गरेपनि कुराकानी नबुझिने समस्याले अहिले ग्राहकहरु टेलिकमप्रति आक्रोशित भएका छन् । टावरले नै काम नगर्दा नेट इन्टरनेटले पनि काम गर्न छोडेको छ । इन्टरनेटबाट काम गर्ने बैंक,अस्पताल, स्थानीय सरकार, विकासका कार्यालयका काममा समेत बाधा हुँदै आएको देखिन्छ ।
जिल्ला सदरमुकाम सिमकोटमा एक महिना अगाडिबाट टेलिकमले फाइवर नेट जडान कार्य थाले लगत्तै टावर र नेटले छिन-छिनमा काम गर्ने, छिन-छिनमा जाने समस्या हुँदा सेवाग्राही मर्कामा परेका छन् । आइतबारबाट टावर र नेट नै बन्द भएको छ । एक महिनादेखिको समस्या भएपनि यसमा कसैको ध्यान जान सकेको छैन ।
यता नेपाल टेलिकमका अनुसार अप्टिकल फाइवर बिच्छ्याउन लागिएको र सामान जिल्ला बाहिरबाट नआएको हुँदा जिल्लामा नेट तथा टावरले राम्रो काम नगरेको हो । सामन आउन अझै महिना दिन लाग्ने देखिएको छ । हुम्लामा नत हवाई सेवा सुचारु छ भने नत यातायातका साधननै राम्रोसँग सुचारु भएको छ । जसले गर्दा स्थानीय मर्कामा परेका छन् ।
