काठमाडौं : वैदेशिक रोजगार विभागले इजरायलका दीर्घकालीन स्याहार केन्द्रहरुमा जानका लागि २ हजार १ सय १२ जनाको नाम सार्वजनिक गरेको छ । विभागले गत असार ११ गते प्रकाशित सूचनाअनुसार अनलाइन दरखास्त पेस गरेका उम्मेदवारमध्ये इजरायली पक्षले १ हजार १ सय ५६ महिला र ९ सय ५६ गरी २ हजार १ सय १२ जनाको छनोट सूची सार्वजनिक गरेको हो ।

विभागले गोलाप्रथा ‘लट्री’बाट छनोट भएको भनि इजरायलको पिबाको इमेलमार्फत आधिकारिक जानकारी आएको बताएको छ । विभागले छनोट भएका कामदारको स्वास्थ्य परीक्षणको मिति पछि जानकारी दिने बताएको छ ।

यसअघि भर्ना प्रक्रियामा सहभागीको नाम छनोट गरेपछि श्रम, रोजगार तथा सामाजिक सुरक्षा मन्त्रालयले त्यसमाथि छानबिन शुरु गरेको थियो । विभागले गत साउन २१ गते १ हजार ८ सय ६३ पुरुष र १ हजार ५ सय ९५ महिला गरी ३ हजार ४ सय ६१ जनाको नाम इजरायली संस्था ‘पिबा’मा पठाएको थियो ।

इजरायलले लैजानेमध्ये ६० प्रतिशत महिला र ४० प्रतिशत पुरुष हुनेछन् । इजरायल जाने कामदारको छनोट प्रक्रियामा अनियमितता भएको र कतिपय इन्स्टिच्युट सञ्चालकले वैदेशिक रोजगार विभागका अधिकृतहरुको नाम जोडेर इजरायलको रोजगारी पक्का भन्दै मोटो रकम उठाएको र कतिपयले नक्कली कागजात पेस गरेको सार्वजनिक भएको थियो । त्यसमा छानबिन जारी रहेको श्रम मन्त्रालयले जनाएको छ ।  

शुरुमा एक हजार पाँच सय नेपाली लैजाने सहमतिअनुसार आवेदन माग भएको अवस्थामा इजरायलले दुई हजारसम्म लैजाने सहमति जनाएको हो । यसअघि इजरायलबाट आठ सय नेपाली कामदारको माग आएको थियो । त्यसमा ५ सय जना मुख्य उम्मेदवार र ३ सय जना वैकल्पिक उम्मेदवार छनोट हुने व्यवस्था थियो । 

इजरायलमा नेपाली केयर गिभरको तलब २ लाख १० हजार रुपैयाँ छ भने शुरुमा करार अवधि १ वर्षको भए पनि करार अवधि थप गर्दै ५ वर्षसम्म बस्न पाइने भएकाले खाडी तथा मलेसिया जानुभन्दा इजरायल जान युवाहरुमा आकर्षण देखिएको बताइएकोे छ । नेपालले छनोट प्रक्रियामा अलमल गरिरहेको बेला भारतले भने १५ हजार कामदार पठाइसकेको छ ।