रौतहट : सर्वसाधारणलाई आवतजावत गर्न सहज हुने उदेश्यले बाँसको लचका निर्माण गरिएको छ । जिल्लाको दक्षिणी भेग ईशनाथ नगरपालिका–गौर नगरपालिका जोड्ने लालबकैया नदीमा बाँसको लचका निर्माण गरिएको छ । वर्षायाम समाप्त भएसँगै लचका निर्माण गरिएको हो ।
पानीको बहाव कम भएसँगै सो ठाउँमा लचका निर्माण गरिएको हो स्थानीयहरु बताउँछन् । गौर नगरपालिका वडा नम्बर ४ टिकुलिया निवासी बिकाउ सहनीले आफ्नो निजि लगानीमा बाँसको लचका निर्माण गरेको स्थानीय पत्रकार अरविन्द यादवले जानकारी गराएका हुन् ।
उक्त ठाउँमा वर्षौदेखि पुल बन्ने क्रममा छ । समयमा पुल नबन्दा स्थानीयलाई सास्ती खेप्नु परेको छ । निर्माण कम्पनीको ढिलासुस्तीका कारण लालवकैया नदी तर्न स्थानीयलाई कठिनाइ हुँदै आएको छ ।
उक्त ठाउँमा पुल निर्माणको काम चाँडै सकाउन स्थानीय युवा संजय सहनीले अनसन समेत बसेका थिए । तर उनलाई आश्वासनको पोका मात्रै दिइयो पुल भने बनेन् । पुल बनाउन ढिला गरेको भन्दै स्थानीयले सधैं आलोचना समेत गर्दै आएका छन् ।
उक्त ठाउँ लालबकैया टिकुलिया घाटमा पुल नहुँदा पटक पटक डुंगा पल्टिने गरेको घटना हुँदै आएको हो ।
