रौतहट : शान्ति सुरक्षाको नाममा जिल्ला प्रशासन कार्यालय रौतहटले गौरमा सञ्चालनमा रहेको मेलामा साँझ ६ बजेसम्मको समय सीमा तोकेको छ । दशैं, तिहार रमाइलो मेला नाममा एभरेष्ट इभेन्ट म्यानजमेन्टले गौर नगरपालिकाको अनुमतिमा सञ्चालन गरेको मेलामा प्रशासनले समय सीमा भन्दै बिहान ६ बजेदेखि बेलुका ६ बजेसम्म मेला सञ्चालन गर्न निर्देशन दिएको छ ।
मेला महोत्सव सञ्चालनको अनुमति दिने निकाय स्थानीय पालिका भएपनि शान्ति सुरक्षाको हवाला दिँदै प्रहरीले जबरजस्ती ६ बजे नै मेला बन्द गराएको मेला समितिका संयोजक रवि मिश्रले बताए ।
‘रौतहट जिल्लाका अन्य स्थानमा कहि कतै मेला लाग्दा उद्योग वाणिज्य संघ, राजनीतिक दल र सर्वपक्षीय भेलाबाट मेला सञ्चालनको निर्णय गरिएको देखिँदैन ।’
संयोजक रवि मिश्रले भने ‘तर गौरमा मनोरञ्जनाका लागि मेला लगाउन खोज्दा यी सबै प्रक्रियालाई अनिवार्य बनाइयो, हामीले यो सबै प्रक्रिया पुरा गर्दा पनि अब प्रशासनले ६ बजे साँझमा नै मेला बन्द गराएको छ ।’
मेला सञ्चालनको तयारी हुँदै गर्दा केही व्यक्तिले आर्थिक लोभका कारण विभिन्न संगठनहरुलाई उचालेर मेला लगाउन नदिने षड्यन्त्र समेत गरेका थिए । मेला सञ्चालन गर्न आएकाहरुसँग रकमको माग गर्दै, आफुले अनुमति दिलाई दिने प्रस्ताव गरेका व्यक्तिहरुको स्वार्थ पुरा नभएपछि प्रहरी प्रशासनलाई प्रयोग गरेर अवरोध खडा गर्ने र सामाजिक संजालहरुमार्फत भ्रमको खेती समेत गरेको संयोजक मिश्रले बताए ।
प्रहरी प्रशासनले साँझ ६ बजे नै मेला बन्द गराएपछि स्थानीय समेत आक्रोशित बनेका छन् । ‘दिनभरी कामकाज गरेर चाडवाडका बेला बेलुका परिवार बालबच्चासँग मेलामा मनोरञ्जन गर्न जाँदा फर्कनु पर्यो ।’ गौर ५ का दिपक गुप्ता भन्छन्,‘मेला भनेकै बेलुका राति ९–१० बजेसम्म घुम्न जाने ठाँउ हो । तर कही नभएको नियम गौरमै देखियो ।’ बिहीवार मेला हेर्न आएकाहरु प्रहरीले साँझमै मेला बन्द गराएपछि आक्रोशित हुँदै फर्किएका थिए ।
शान्ति सुरक्षाको नाममा प्रहरीले मेलाप्रति अन्यायपूर्ण व्यवहार गरिरहेको स्थानीयको आरोप रहेको छ । ‘जिल्लाकै अन्य स्थानमा प्रत्येक वर्ष आर्कषक मेला लाग्छ, तर गौरमा वर्षौपछि लागेको मेलालाई कसरी असफल बनाउने भन्ने षड्यन्त्र जारी छ ।’ गौरका स्थानीय व्यवसायी पुष्प यादव भन्छन् ‘उद्योग वाणिज्य संघले व्यापार व्यवसाय प्रवद्र्धनका लागि काम गर्नुपर्नेमा यहाँ उल्टो भएको छ ।’ मौलापुर र चन्द्रपुर नगरपालिकाले प्रत्येक वर्ष लगाउने मेलामा समय सीमा नतोकिने तर गौरकै मेलालाई साँझमै बन्द गराउनु दुर्भाग्यपूर्ण रहेको उनले बताए ।
दशंैका बेला दुर्गा भगवती गाँउपालिकामा मेला लाग्दा त्यहाँ कसैले विरोध नगरेको तर गौरमा भने मेलामा पनि तुच्छ राजनीति गर्न खोजेको स्थानीयले बताएका छन् । यस्तो रवैका कारण भोलिको दिनमा कोही पनि व्यक्ति बाहिरबाट गौरमा मेला लगाउन नआउने गौर नगरपालिकाका प्रवक्ता एवम् वडा नं. ९ का वडाध्यक्ष अर्जुन सिंहले बताए । गौर लगायत आसपासका नागरिकहरुको चाहना अनुसार मेलाको समय अवधि राति १० बजे सम्म हुनुपर्ने उनको तर्क रहेको छ ।
शान्ति सुरक्षाका लागि मेला आयोजकले बीमा, सुरक्षागार्ड, घेराबार लगायतको व्यवस्था गरेपनि मेला असफल गराउने प्रयास भइरहेको आयोजकको आरोप रहेको छ ।
