काठमाडौं : नेपाली कांग्रेस र नेकपा एमालेले देशभर दुई दलीय संयन्त्र बनाएका छन् । संघीय संसदका दुई ठूला दल नेपाली कांग्रेस र नेकपा एमालेले संयुक्त सरकार चलाइरहेका छन् ।
सरकारको कामकारबाही प्रभावकारी बनाउन र सत्ता गठबन्धन थप कसिलो गराउन नेपाली कांग्रेस र नेकपा एमालेले संघ, प्रदेश र जिल्ला तहमा शक्तिशाली दुई दलीय संयन्त्र बनाएका हुन् । संयन्त्रमा सम्बन्धित तहका प्रभावशाली नेता रहेका छन् ।
संघीय संयन्त्रमा सरकारको नेतृत्वकर्ता दल एमालेबाट वरिष्ठ उपाध्यक्ष ईश्वर पोखरेल, उपाध्यक्ष एवं अर्थमन्त्री विष्णु पौडेल, महासचिव शंकर पोखरेल र प्रधानमन्त्रीका राजनीतिक सल्लाहकार विष्णु रिमाल छन् । कांग्रेसबाट उपसभापति पूर्णबहादुर खड्का, महामन्त्री गगन थापा, गृहमन्त्री रमेश लेखक र परराष्ट्र मन्त्री आरजु राणा देउवा छन् ।
संयोजन दुई दलले एक÷एक महिना पालैपालो गर्नेछन् । कात्तिक २१ देखि मंसिर २० गतेसम्म पहिलो महिनाको संयोजन कांग्रेस उपसभापति खड्काले गर्नेछन् । केपी शर्मा ओली र शेरबहादुर देउवाको निर्देशन अनुसार संयन्त्रले काम गर्नेछ ।
केन्द्रकै शैलीमा प्रदेशमा पनि प्रदेशको इञ्चार्ज, अध्यक्ष, प्रदेश संसदीय दलको नेता, जिल्ला अध्यक्ष संयन्त्रमा रहनेछन् ।
आगामी डिसेम्बरमा हुने प्रधानमन्त्री ओलीको चीन भम्रणको तयारीका लागि ओली र देउवाको निर्देशनमा परराष्ट्रमन्त्री देउवालाई जिम्मेवारी दिइएको छ । कार्यदलले भ्रमणका लागि आवश्यक गृहकार्यमा सहजीकरण गर्ने निर्णयमा उल्लेख छ ।
दुई तिहाइ बहुमतको सरकारको काम प्रभावकारी हुन नसकेको भनेर कतिपयले आरोप लगाइरहेका बेला दुई दलीय संयन्त्र बनाउने निर्णय भएको छ । यसले दुई दलका बीचमा रहेका कतिपय अविश्वास समेत स्वतः कम गरेर लैजाने नेताहरूको विश्वास छ । दुई दलीय संयन्त्रको सचिवालयका सचिव केशवराज जोशीका अनुसार संयन्त्रको प्रमुख उदेश्य सरकारलाई सफल बनाउनु हो ।
जोशीले विज्ञप्तिमा लेखेका छन्, ‘संयुक्त सरकारलाई सफल र प्रभावकारी बनाउन ...नेकपा एमालेका अध्यक्ष एवं प्रधानमन्त्री केपी शर्मा ओली र पूर्व प्रधानमन्त्री एवम नेपाली कांग्रेसका सभापति शेरबहादुर देउवाको नेतृत्वमा दुई दलीय राजनीतिक संयन्त्र निर्माण गरिएको छ ।’
.jpg)
