रौतहट : रौतहटमा यतिखेर किसानहरुलाई धान भित्र्याउने चटारो छ । तर जिल्लाका अधिकांश किसानले मुख्य सडकमै धानको भारी र पराल थुपारेर राखेका कारण दुर्घटनाको जोखिम बढेको पाइएको छ । जिल्लाको ग्रामीण भेगदेखि लिएर शहरी क्षेत्रको समेत सडकमा नै किसानहरुले धान र पराल राख्ने गरेका कारण सवारी दुर्घटनाको जोखिम बढेको हो ।
किसानले सडकमै पराल र धानको भारी थुपारेर राख्दा जतिबेला पनि दुर्घटना भइ ठूलो मानवीय क्षति हुनसक्ने अवस्था रहेको देवाहि गोनाही नगरपालिका ५ का राम सेवक रायले बताए ।
खासगरी ग्रामीण भेगका सडकहरुको दुवै साईडमा सडक च्यापेर किसानहरूले पराल र धान राखेका छन् । त्यति मात्र नभइ किसानहरुले धान थ्रेसर समेत बाटोमै लगाइदिने गरेका छन् । बाटोमै धान र पराल थुपार्ने गरेका कारण सवारी साधनमा हिँड्डुल गर्न समस्या हुने गरेको यादवले दुखेसो गरे ।
मान्छे र सवारी हिँडने सडकमा धान थ्रेसर लगाउने गरेको कारण बाटो हिँड्नेको आँखामा धुलो परेर हिँड्न समेत समस्या हुने गरेको स्थानीयहरुको भनाइ छ ।
जिल्लाको देवाही गोनाहि, गढिमाई, वृन्दावन लगायत पालिकाको विभिन्न ठाउँको अति व्यस्त हुने सडकमा नै किसानले धानबाली राख्ने गरेका कारण सर्वसाधारणलाई सो बाटो भएर आवत–जावत गर्न निकै समस्या भइरहेको देखिएको छ ।
बाटोमै धान र पराल थुपार्ने तथा थ्रेसर लगाउने गरेका कारण दुर्घटनाको जोखिम बढेको भए पनि सम्बन्धित निकायले यस समस्याप्रति कुनै ध्यान नदिएको स्थानीयको गुनासो छ ।
