काठमाडौं : बाल कलाकार सम्राट दाहालको एकल अभिनय रहेको नयाँ गीत ‘अस्ति भन्दा’को भिडियो सार्वजनिक भएको छ । गीतको भिडियोलाई सम्राट क्रिएसनको युट्युब च्यानलबाट सार्वजनिक गरिएको हो । 

१४ वर्षीय सम्राटले अभिनय गरेको यो १४औं भिडियो हो । राष्ट्रिय भावको भिडियोमा पहिलो पटक अभिनय गरेका सम्राटले त्यसपछि निरन्तर मोडलिङ गर्दै आएका छन् । सम्राट गीतमा आफूजस्तै किशोरहरूको भावना समेटिएकाले यसमा आफूले अभिनय गरेको बताउँछन् ।

गीतमा नेपाल आइडल सिजन ५का विजेता करण परियारको स्वरमा छ । गीतमा संगीतकार दीपक शर्माले संगीत भरेका छन् । गीतमा सम्राट न्यौपानेको संगीत संयोजन रहेको छ । 

किशोर मनोविज्ञानमा आधारित भएर तयार गरिएको यो गीतलाई निर्देशक सुमन दाहालले लेखेका हुन् । भिडियोमा निर्देशन पनि सुमनकै रहेको छ ।

गीतको भिडियोको सबै छायांकन अमेरिकाको केन्टकी राज्यका विभिन्न रमणीय स्थानमा गरिएको हो । पवन गौतम र चाल्र्स मोरल्याण्ड तृतीयले भिडियो छायांकन गरेका हुन् ।