स्वास्थ्य मन्त्री भानुभक्त ढकालले पत्रकार सम्मेलन गरी नेपालमा पनि कोरोना भाइरसको संक्रमण देखिएको जनाएका छन् । केही समय यता कोरोनाको संक्रमण देखिएको अफवाह फैलाइएको पाइए पनि मन्त्री ढकालले नै पहिलो पटक संक्रमणबारे औपचारिक जानकारी दिएका हुन् । फ्रान्सबाट कतार हुँदै आएकी १९ वर्षीया एक विद्यार्थीलाई कोरोनाको संक्रमण देखिएको स्वास्थ्य मन्त्री ढकालले पुष्टि गरे । उनी चैत ४ गते काठमाडौं ओर्लिएकी थिइन् । उनको स्वास्थ्य रिपोर्टमा कोडिभ–१९ पोजिटिभ देखिएको छ । कोरोना संक्रमण देखिए पछि ती युवतीलाई अस्पताल भर्ना गरिएको छ ।
यसअगाडि पनि नेपालमा एक जनामा कोरोनाको संक्रमण देखिएको थियो । चीनबाट स्वदेश फर्किएका एक जनामा कोरोनाको संक्रमण देखिएको थियो । तर, त्यसबेला सरकारले औपचारिक जानकारी दिएको थिएन । ती संक्रमितलाई निको पनि भइसकेको छ । यसपटक भने चीन नभएर यूरोपेली मुलुकबाट स्वदेश फर्किएकी युवतीमा संक्रमण देखिएको छ । यूरोपेली मुलुकलाई कोरोनाको इपी सेन्टर नै मानिएकाले राजधानी उपत्यका सहित देशभर यसको त्रास देखिएको छ । तर, यस्तो बेला आतंकित भएर भन्दा पनि सचेत भएरै सोच्नुपर्ने हुन्छ । सरकारले राजधानी उपत्यका सहित देशभर कडा नियमको घोषणा गरेको छ । चीन र भारत सहित स्थलगत आवागमन सहित अन्तर्राष्ट्रिय उडान ठप्प पारेको छ । सरकारी कर्मचारीलाई समेत घरमै तैनाथ राखेर विदा दिइएको छ ।
चीनको हुपेई प्रान्तको वुहान शहर भएर फैलिएको कोरोना संक्रमणबाट विश्वका १८६ देश प्रभावित भइरहेका बेला राजधानी उपत्यकामै कोरोनाको संक्रमित देखिनु र सरकारले पनि कडा नीति अख्तियार गरेकाले सेल्फ क्वारेन्टाइनमा बस्नेको संख्या बढ्ने अनुमान गर्न सकिन्छ । सेल्फ क्वारेन्टाइन सहज विकल्प समेत हो । तर, क्वारेन्टाइन बस्न भने सजिलो छैन । दैनिकी अवरुद्ध हुने, रोजीरोटीको बाटो अवरुद्ध हुने र विशेषगरी बालबालिकामा यसको नराम्रो प्रभाव पर्न जान्छ । तर, यो बाध्यकारी विकल्पलाई सिर्जनात्मक बनाउनुको विकल्प रहन्न । रोकथामको उपचार नै सेल्फ क्वारेन्टाइन भएकाले यसबाट उत्पन्न मनोवैज्ञानिक त्रासबाट बृद्धबृद्धा एवम् बालबालिकालाई सहज बातावरण बनाउनु उचित हुनेछ । यस्ता महामारीबाट जोगिन सरकारले नेपाल लकडाउनकै घोषणा गरेको छ । यसले दैनिकी थप असहज हुने भए पनि घरभित्रै तनावमुक्त भएर सचेतता अपनाउन आवश्यक छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies