रियाद : साउदी अरेबियाले महिला कामदारलाई रोजगारीमा प्रवेश गराउने कार्यमा उल्लेख्य प्रगति हासिल गरेको बताएको छ । सन् २०२० देखि २०२४ को दोस्रो त्रैमासिक अवधिसम्म ४ लाखभन्दा बढी साउदी महिलाहरू रोजगारीमा प्रवेश गरेका छन् ।

तथ्यांकले लगातार ४ वर्षसम्म दैनिक आधारमा ३२८ साउदी महिला श्रम बजारमा प्रवेश गरेका देखाएको साउदी समाचारपत्रहरूले उल्लेख गरेका छन् । 

लामो समयसम्म आप्रवासी कामदारमा निर्भर साउदी अरेबियाले महिलाहरूका लागि ४ हजार साउदी रियाल तलब कायम गरेकोे छ । यसले साउदी महिलाहरू रोजगारीमा प्रवेश गरेकोे र बेरोजगारी दर ३१ दशमलव ४ प्रतिशतबाट १२ दशमलव ८ प्रतिशतमा झरेको साउदी मानव संशाधन तथा सामाजिक विकास मन्त्रालयलाई उद्धृत गर्दै स्थानीय ओकाज दैनिकले उल्लेख गरेको छ ।

आगामी दिनमा अध्ययन पूरा गरेका महिला साउदी अरेबियाको निजी तथा सरकारी सेवामा जोडिने क्रममा वृद्धि हुने बताइएको छ ।