सर्लाही : बरहथवा–नयाँरोड सडकखण्ड अन्तर्गत सर्लाहीको बरहथवामा सोमबार राति ट्याक्टर र मोटरसाइकल एकआपसमा ठोक्किँदा मोटरसाइकलमा सवार २ जनाको मृत्यु भएको छ ।
बरहथवा नगरपालिका–९, शान्ति चोकमा भएको दुर्घटनामा मोटरसाइकलमा सवार बरहथवा नगरपालिका–५ का २५ वर्षीय हरिन्द्र महतो र २२ वर्षीय पुर्षोत्तम दासको मृत्यु भएको हो । बरहथवाबाट नयाँरोडतर्फ उखु बोकेर जाँदै गरेको ज १ च ९८७६ नम्बरको ट्याक्टरमा महतोले चलाएको ज ४ प ३७७ नम्बरको मोटरसाइकल अगाडिबाट ठोक्किएको इलाका प्रहरी कार्यालय बरहथवाले जनाएको छ ।
दुर्घटनालगत्तै उपचारका लागि महतोलाई बरहथवा बजारस्थित संजिवनी हस्पिटल र दासलाई वीरगन्जस्थित वैद हस्पिटल पुर्याउँदा चिकित्सकले मृत घोषणा गरेको इलाका प्रहरी कार्यालय बरहथवाका प्रहरी नायव उपरीक्षक गौतम थापाले जानकारी दिए । मृतक महतोको शव पोष्टमार्टमका लागि प्रादेशिक अस्पताल मलंगवा पुर्याइएको छ भने अर्का मृतक दासको शव वीरगन्जमै रहेको छ ।
प्रहरीले दुर्घटनामा परेको मोटरसाइकल र ट्याक्टरसहित चालक सर्लाहीको बलरा नगरपालिका-७ का ३८ वर्षीय वीरेन्द्र महतोलाई नियन्त्रणमा लिएको छ ।
