.jpg)
काभ्रे : काभ्रेपलाञ्चोकको खानीखोला र बेथाचोक गाउँपालिकाको सिमाना थामलेखमा रहेको सामुदायिक वनमा लागेको आगो नियन्त्रण बाहिर पुगेको छ ।
जिल्लाको महाभारत लेकस्थित खानीखोला गाउँपालिका –१ थामको लेक डाँडामा आगलागी भएको हो । मंगलबार दिउँसो लागेको आगो नियन्त्रण बाहिर गएको काभ्रे प्रशासन ले जनाएको छ । प्रहरी चौकी फलामेटारबाट गएको प्रहरी टोली र स्थानीय आगो निभाउन खटिए पनि नियन्त्रणमा आउन सकेको छैन ।
काभ्रेका प्रमुख जिल्ला अधिकारी उमेशकुमार ढकालका अनुसार तत्काल निभाउन सकिने अवस्था छैन । भीर भएको वन क्षेत्रमा आगलागी भएका कारण तत्काल आगो निभाउन नसकिएको उनले बताए ।
आगलागी भएको वन क्षेत्रमा नेपाली सेना र नेपाल प्रहरीको टोली परिचालन गरिएको छ । वनमा लागेको आगो मानवबस्तीसम्म आउन नदिनका लागि सुरक्षाकर्मीले सर्तकता अपनाएको छ । गाउँबस्तीबाट करिब ४ किलोमिटर टाढा उत्तरमा पर्ने जंगलमा आगो लागेको हो ।
सामुदायिक वनको भीरमा लागेको आगो तत्काल निभाउन नसकिने अवस्था भएको प्रहरीले जनाएको छ ।
