काठमाडौं : पछिल्लो समय विभिन्न किसिमका विद्युतीय भुक्तानीसम्बन्धी सेवाहरुको विस्तारमा आक्रामक रहेको प्रभु बैंक लिमिटेडले भिजा इन्टरनेशनलसँगको सहकार्यमा प्रभु बिजनेश डेबिट कार्ड सेवा एक समारोहका बीच आइतबारदेखि सञ्चालनमा ल्याएको छ ।
प्रभु बैंकले सञ्चालनमा ल्याएको बिजनेश डेबिट कार्ड सेवा अन्तर्राष्ट्रियरुपमै व्यावसायिक कारोबारको सरल र सुरक्षित विद्युतीय भुक्तानीको माध्यम मानिन्छ ।
चल्ती खाता खोली कारोबार गर्ने/गरिरहेका खाताधनीहरुलाई लक्षित गरी डेबिट कार्डसम्बन्धी सुविधा उपलब्ध गराउने अभिप्रायले बिजनेश डेबिट कार्ड सेवा थालनी गरिएको बैंकले जनाएको छ । बिजनेस डेबिट कार्ड विशेषगरी व्यापारिक प्रयोजनका लागि मात्र लक्षित रहेको बैंकको भनाइ छ ।
प्रभु बैंकले भनेको छ, 'व्यापारिक घरानाहरू, फर्महरू, कम्पनीहरू, स्कुल तथा कलेज र विश्वविद्यालयहरू, होटल र रेस्टुरेन्टहरू, अस्पतालहरू आदिमा सीमित हुन सक्दछन् जसले आफ्ना व्यापारीहरू, विक्रेताहरू, आपूर्तिकर्ताहरू र सेवा प्रदायक आदिलाई नियमित रूपमा साना र ठूला भुक्तानीहरू गर्दछन् । यो एक विशिष्ट किसिमको विद्युतीय भुक्तानीको औजार हो जहाँ कार्ड मार्फत गरिएको भुक्तानी सुरक्षित रहन्छ ।'
बिजनेस डेबिट कार्डको मद्दतले, बिजनेस हाउसहरूले यात्रा र मनोरञ्जन हेडसँग सम्बन्धित आफ्नो खर्चलाई डिजिटलाइज गर्न सक्नेछन् । यस सम्बन्धमा, बिजनेस डेबिट कार्डको मद्दतले, टिकटहरू (हवाई र बस) तुरुन्तै अनलाइन वा पीओएस टर्मिनलहरू मार्फत ट्राभल एजेन्टहरुसँग खरिद गर्न सकिने बैंकले जनाएको छ । यसरी व्यावसायिक प्रयोजनमा आफ्ना कर्मचारीहरूलाई कुनै पनि अग्रिम सुविधा प्रदान गर्नु नपर्ने बैंकले बताएको छ ।
बिजनेस डेबिट कार्डको मद्दतले, व्यापारिक घरानाहरूले आफ्नो कार्डमार्फत सिधै आफ्नो आपूर्ति र खरिदका लागि भुक्तानी गर्न सक्ने बैंकले जनाएको छ ।
बिजनेस डेबिट कार्डको मद्दतले व्यावसायिक कारोबारको भुक्तानीमा सहजता भइ व्यवसाय प्रवर्द्धनमा सहजता तथा पारदर्शितासमेत कायम रहने बैंकले विश्वास लिएको छ ।
