काठमाडौं : लुम्बिनी प्रदेश सरकार, उद्योग पर्यटन तथा यातायात मन्त्रालय, पर्यटन डिभिजन कार्यालय, रुपन्देहीको आयोजनामा फागुन २६ देखि २९ सम्म थारु जातिका बडघरको अन्तरप्रदेश भ्रमण सम्पन्न भएको छ ।
गत आ.व. २०८०/०८१ मा कार्यालयले नवलपरासी पश्चिम, रुपन्देही र कपिलवस्तु जिल्लाका १ सय ५० जना भन्दा बढी बड्घरहरुलाई नेतृत्व तथा क्षमता विकास सम्बन्धी तालिमको आयोजना गरेको थियो । सोही तालिमलाई थप प्रभावकारी बनाउने उद्देश्यले चालु आवमा थारु कल्याणकारिणी सभा जिल्ला कार्यसमितिसँगको समन्वयमा बडघरहरुको प्रतिनिधिमूलक टोली तयार पारी पश्चिम तराईका जिल्लाहरुको भ्रमण कार्यक्रम तयार गरिएको कार्यालयका निमित्त कार्यालय प्रमुख नेत्र प्रसाद भुसालले जानकारी दिए ।
भ्रमण कार्यक्रममा बडघर सम्बन्धी ऐन जारी भएका २ वटा स्थानीय तहहरुसँग अन्तरक्रियात्मक कार्यक्रम सञ्चालन भएको थियो । कैलाली जिल्लास्थित जानकी गाउँपालिकामा फागुन २७ गते भएको अन्तरक्रियात्मक कार्यक्रम गाउँपालिकाका अध्यक्ष गणेश चौधरीको अध्यक्षतामा सम्पन्न भएको थियो ।
गाउँपालिकाले बडघर÷भलमन्सा, ऐन २०८१ जारी गरेकाले सोही ऐनसँग सम्बन्धित रहेर प्रस्तुतीकरण दिइएको थियो । जसमा भ्रमण टोलीका सहभागीहरुले आफ्ना जिज्ञाशा राखेका थिए भने गाउँपालिका अध्यक्ष गणेश चौधरीले जिज्ञाशाको उचित जवाफ दिएका थिए ।
त्यस्तै फागुन २८ गते बर्दिया जिल्लास्थित बारबर्दिया नगरपालिकामा भएको अन्तरक्रियात्मक कार्यक्रम नगरपालिकाका कार्यपालिका सदस्य श्याम कुमारी चौधरीको अध्यक्षता, नगर प्रमुख छविलाल थारुको प्रमुख आतिथ्यता र उपप्रमुख रत्ना पाण्डेको विशिष्ट आतिथ्यतामा सम्पन्न भएको थियो । वि.स.२०७७ सालमा नेपालमै पहिलो पटक बडघर ऐन, २०७७ जारी गरेको नगरपालिकाका नगरप्रमुख छविलाल थारुले सोही ऐन र नगरपालिकाको समग्र वस्तुस्थितिबारे प्रस्तुतीकरण दिएका थिए ।
साथै भ्रमण टोलीका जिज्ञासालाई समेत स्पष्ट पारेका थिए । भ्रमण कार्यक्रममा लुम्बिनी प्रदेशका दाङ, बाँके, बर्दिया तथा सुदरपश्चिम प्रदेशको कैलाली जिल्लाका विभिन्न धार्मिक तथा पर्यटकीय क्षेत्रको अवलोकन समेत भएको कार्यालयका अधिकृत जनक राज खनालले जानकारी गराएका थिए ।
