काठमाडौं :सरकार संचालन गरिरहेको नेकपा एमालेले सडक प्रदर्शन गर्ने घोषणा गरेको छ ।
एमालेले संंघीय लोकतान्त्रिक गणतन्त्रको पक्षमा जनमत सिर्जना गर्न देशव्यापी जनसचेतना अभियान संचालन गर्ने घोषणा गरेको हो । मुलुकमा भइरहेका प्रतिगामी गतिविधिविरुद्ध जनतालाई सचेत गराउन एमालेले यस्तो कार्यक्रम आयोजना गर्न लागेको महासचिव शंकर पोखरेलले बताए ।
११ चैतमा एकै दिन एकै समय देशैभर सबै वडामा जनसचेतना कार्यक्रमको घोषणा एमालेले गरेको हो । महासचिव पोखरेलले बिहीबार सबै प्रदेश र जिल्ला कमिटीका अध्यक्षहरूलाई भर्चुअल बैठकबाट सम्बोधन गर्दै पार्टीले तय गरेको कार्यक्रम प्रभावकारी रूपमा कार्यान्वयनमा लैजान निर्देशन दिएका छन् ।
११ देखि ३० चैतसम्म सबै प्रदेश र जिल्लामा प्रतिगामी हर्कतविरुद्ध जनपरिचालन, जनसचेतना कार्यक्रम आयोजना गरिने छ । यस क्रममा ११ चैतमा धनगढी, सुर्खेत, बुटवल, पोखरा, वीरगन्ज र दमकमा मोटरसाइकल ¥याली आयोजना गरिने छ । १८ चैतमा सबै जिल्लामा जिल्लास्तरीय जागरणसभा आयोजना गरिने छ भने २४ देखि ३० गतेसम्म बाग्मतीबाहेकका ६ वटै प्रदेशका धनगढी, सुर्खेत, बुटवल, पोखरा, वीरगन्ज र दमकमा विशेष प्रदर्शन र जनसभा गरिने छ ।
प्रदेश तहमा हुने विशेष सभामा पार्टी केन्द्रबाट वक्ता पठाइने छ भने जिल्ला तहको सभाका लागि आवश्यक परेका ठाउँमा त्यस्तो व्यवस्था गरिने एमालेले जनाएको छ ।
एमाले केन्द्रीय सचिवालयको ४ चैतमा बसेको ४६औं बैठकले लोकतान्त्रिक गणतन्त्र र नेपालको संविधानविरुद्ध भइरहेका सुनियोजित गतिविधिप्रति गम्भीर रूपमा छलफल गरी पार्टीले नेपालको संविधान र यसले संस्थागत गरेको संघीय लोकतान्त्रिक गणतन्त्र, समावेशी प्रणाली र सामाजिक न्याय जस्ता उपलब्धि रक्षाका लागि दृढतापूर्वक उभिने संकल्प गरेको थियो ।
