काठमाडौं : नेपाल आयल निगमले हरेक प्रदेशमा कम्तीमा ९० दिनका लागि इन्धन भण्डार क्षमता वृद्धि गर्ने अभियानलाई तीव्रता दिएको छ । नेपाल सरकार र नेपाल आयल निगमको घोषित नीति तथा कार्यक्रम अन्तर्गत अहिले धमाधम हरेक प्रदेशमा यस अभियानलाई तीव्रता दिएको हो । सोही क्रममा सुदूरपश्चिम प्रदेशमा पनि भण्डार बन्ने भएको छ ।
आइतबार उद्योग वाणिज्य तथा आपूर्ति मन्त्री लेखराज भट्टसहितको टोलीले स्थलगत अवलोकन गरेको छ । मन्त्री भट्ट, नेपाल आयल निगमका कार्यकारी निर्देशक सुरेन्द्रकुमार पौडेल, सुदूरपश्चिम प्रादेशिक कार्यालयका प्रमुख तथा कर्मचारीसँगै स्थानीय जनप्रतिनिधिसहितको टोलीले कैलालीको गोदावरी नगरपालिका ८ स्याउले स्थित शिवशक्ति महिला सामुदायिक वनको मातहतमा रहेको करिब ३० बिगाहा जमिन प्राप्त गर्न प्रारम्भिक स्थलगत अवलोकन गरेको हो ।
हाल न्यूनतम मात्रामा भण्डारण क्षमता रहेको र पेट्रोलियम पदार्थको बढ्दो मागलाई धान्न सक्ने गरी क्षमता विस्तारका लागि उपयुक्त स्थल देखिएकाले यसको व्यवस्थापनमा अग्रणी भूमिका निर्वाह गरी सहयोग गर्ने मन्त्री भट्ट, निगमका कार्यकारी निर्देशक सुरेन्द्रकुमार पौडेल, जनप्रतिनिधि, शिवशक्ति सामुदायिक वनका अध्यक्ष लगायतलाई प्रदेशिक प्रमुख चितरंजन दासले विज्ञप्ति मार्फत धन्यवाद ज्ञापन गरेका छन् ।
यसअघि आयल निगमले किनेका जग्गाहरु विभिन्न ठाउँमा विवादमा आए पनि अहिले भने व्यक्तिको नभई सरकारी जग्गाहरुमै जोड दिँदै आएकाले विवाद नभएको समेत बताइएको छ ।
यसैबीच लुम्बीनी प्रदेश अन्तर्गतका जिल्लाहरु रुकुम(पूर्व), रोल्पा, दाङ, सल्यान, प्युठान लगायतका जिल्लाहरुमा हवाई सेवा मार्फत सहज पहुँचका लागि दाङको तुल्सीपुरस्थित विमानस्थलमा निगमको भण्डारण तथा सेवा विस्तार कार्यक्रम अन्तर्गत सानो एएफएस परियोजनाको प्रारम्भ गरिएको छ ।
सोही अन्तर्गत सोमबार तुलसीपुर उपमहानगरपालिका प्रमुख घनस्याम पाण्डे, नेपाल आयल नियम लिमिटेडका कार्यकारी निर्देशक सुरेन्द्र कुमार पौडेल, स्थानीय जनप्रतिनिधि, नागरिक उड्डयन प्राधिकरण केन्द्रीय कार्यालयका प्रतिनिधि ई.पुष्पकाराज न्यौपाने र नेपाल आयल निगम लिमिटेडका कर्मचारीलगायतको टोलीले तुल्सीपुर उपमहानगरपालिकास्थित टरीगाउँ, दाङ विमानसथ्लमा हवाई इन्धन डिपो स्थापनाको लागि आवश्यक पर्ने जग्गा विमान स्थलको मुल गेटको दक्षिणतर्फ स्थापना गर्ने एकिन गरेको छ ।
साथै निगमको संरचना पूर्णरुपमा आइसोलेट र उच्चत्तम सुरक्षा प्रबन्ध गर्नुपर्ने भएकाले रिफाईलर मोभिमेन्टलाई पूर्णरुपले आइसोलेट रहने गरी उक्त स्थानमा आवश्यक पूर्वधार एवं सरचना निर्माणमा तुलसीपुर उपमहानगरपालिकाले सहयोग गर्ने निर्णय भएको जानकारी गराइएको थियो । निगमका प्रादेशिक प्रमुख प्रलयङ्कर आचार्यले एक विज्ञप्ति जारी गर्दै यस कार्यको लागि अग्रणी भूमिका निर्वाह निर्वाह गर्ने मन्त्री, महानगरपालिकाका मेयर, निगमका कार्यकारी निर्देशक, स्थानीय जनप्रतिनिधि, तुलसीपुर उद्योग वाणिज्य संघका पदाधिकारी, सञ्चारर्मी लगायत सरोकारवालालाई धन्यवाद ज्ञापन गरेका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies