नेपाल वैदेशिक रोजगार व्यवसायी संघका पूर्वअध्यक्ष विमलप्रसाद ढकाल संख्या सय समस्याको समाधान नभएसम्म चुनाव गर्नुको कुनै अर्थ नरहने भन्दै गत फागुनमा तोकिएको निर्वाचन सार्ने विषयमा अगुवाइ गर्ने व्यवसायी हुन् । आगामी २९ चैतमा हुने संघ कार्यसमितिको निर्वाचनम पूर्वअध्यक्ष ढकाल आफैं पूर्वअध्यक्ष रहेकोे नेपाल लोकतान्त्रिक वैदेशिक रोजगार व्यवसायी एसोसिएसनले पार्टीको नीतिविपरीत चुनावी तालमेल गरेकोे र उम्मेदवार छान्ने निर्णयमा अपरिपक्वता देखाएको भन्दै सिन्डिकेट रोक्न र संघलाई प्रभावकारी बनाउन प्रगतिशीलसँग तालमेल र सहकार्य गरेर अघि बढ्ने चुनौतीको बाटोमा अघि बढेका छन् । प्रस्तुत छ, संघका पूर्वअध्यक्ष विमलप्रसाद ढकालसँग संघको निर्वाचनको सन्दर्भमा मध्यान्हले गरेको कुराकानीको सम्पादित अंश :

नेपाल वैदेशिक रोजगार व्यवसायी संघको निर्वाचनमा नरेश गेलाल नेतृत्वको संयुक्त व्यवसायी समूहको निर्वाचन परिचालन समितिमा हुनुहुन्छ । तयारी कस्तो छ ?

प्रगतिशील वैदेशिक रोजगार व्यवसायी मञ्च नेपाल, नेपाल लोकतान्त्रिक वैदेशिक रोजगार व्यवसायी एसोसिएसनको अर्को पक्ष र एकीकृत वैदेशिक रोजगार व्यवसायी संगठनबीचको तालमेलमा बनेको नरेश गेलाल प्यानलले राजधानीका विभिन्न क्षेत्रमा क्षेत्रीय भेलाहरू सम्पन्न गरेको छ ।

अत्यन्तै प्रखर, अनुभवी र क्षमतावान् व्यवसायीहरू रहेकोे अत्यन्तै सन्तुलित प्यानल बनेका कारण आमव्यवसायीमा नयाँ उत्साह देखिएको छ । सिन्डिकेट रोक्न र संघलाई प्रभावकारी बनाउन प्रगतिशीलसँग तालमेल र सहकार्य गरिएको विषयमा हामीले सबै भेलाहरूमा व्यवसायीलाई बुझाएका छौं, हाम्रा प्रतिबद्धता राखेका छौं ।

प्रमुख ३ घटकको उम्मेदवार प्यानलमा तालमेल, तराईका सबै व्यवसायी र प्रजातान्त्रिक वैदेशिक रोजगार व्यवसायी संगठनको समर्थनले टिम अतिबलियो अवस्थामा रहेकोे प्रस्ट भएको छ ।

तपाईंहरूको प्यानलका मुख्य एजेन्डा के–के छन् ?

वैदेशिक रोजगार क्षेत्र विगत केही समयदेखि त्रासपूर्ण अवस्थामा छ । हाल विशेषगरी संख्या सयको बाध्यता हटाएर सधैंका लागि समस्या समाधान गर्न संसद्मा विचाराधीन अवस्थामा रहेको वैदेशिक रोजगार ऐनको संशोधन विधेयक पारित गराउन भूमिका खेल्नुपर्ने बाध्यात्मक अवस्था एकातिर छ भने सिन्डिकेटको विषयमा व्यवसायीहरू त्रसित अवस्थामा हुनुहुन्छ । 

सिन्डिकेटलाई परास्त गर्न सकिएन भने साढे ४ सय बढी व्यवसायीको लाइसेन्स नै जाने र धेरै व्यवसायीले जिन्दगीभर गरेकोे पेसा व्यवसायबाट सधैंभरिका लागि हात धुनुपर्ने खतरा छ ।

बायोमेट्रिक, भीएलएन, एससीसी, साउदी भिसा सेन्टर जस्ता विभिन्न नाममा मन्त्रीका कारणले सिन्डिकेट लागेको हो । नेपालको सन्दर्भमा डरलाग्दो अवस्था के देखियो भने मापि(mयासँग साँठगाँठमा रहेकोे तत्त्वले नेपाल र कामदार जाने दुवै देशमा पोलिसीका नाममा सिन्डिकेट खडा गर्ने गरेकोे देखियो ।

विगतमा स्वास्थ्य परीक्षणका नाममा सिन्डिकेट आयो, अहिले २५ वटा म्यानपावर कम्पनीलाई मात्रा मलेसियामा कामदार पठाउन पाउनेगरी डिजाइन तयारी अवस्थामा राखिएको विभिन्न माध्यमबाट सार्वजनिक भइरहेको छ । यस्तो अवस्थामा संघमा आमव्यवसायीका पक्षमा काम गर्ने नेतृत्वको टड्कारो देखियो ।

सिन्डिकेटको विषय विगतमा पनि चुनावी नारा बनेको थियो । यस पटक पनि एक प्यानलले अर्कोतिर आक्षेप लगाउने गरेकोे देखिन्छ । यसले अन्योल बढाएको व्यवसायीहरू बताउँछन् । तपाईं कसरी स्पष्ट गर्नुहुन्छ ?

यस पटक संघको निर्वाचनमा २ प्यानल बनेको प्रस्ट देखिन्छ । गहिरिएर विश्लेषण गर्दा के देखियो भने विगतमा बायोमेट्रिक स्वास्थ्य परीक्षण गराउने मामिलामा जो–जो सक्रिय थिए, उनीहरू एकै ठाउँमा ऐक्यबद्ध भएर लागेका छन् ।

उनीहरू संघमा केही गर्न नसक्नेलाई ‘डमी’ नेतृत्व स्थापित गर्ने योजनामा छन् । नेतृत्वलाई सानो लोभलालचमा फसाएर काम गराउने योजनामा छन् । विगतमा हामीले बनाएका अध्यक्ष सानातिनो लोभलालचमा फसे ।

तत्कालीन मन्त्रीले तत्कालीन अध्यक्षलाई किनेर बायोमेट्रिक लगाए । अहिले नरेश गेलालको नेतृत्वमा राजनीतिक र व्यावसायिक रूपमा परिपक्व टिम आएको छ । सिन्डिकेटलाई परास्त गरेर व्यवसायीको हित रक्षा गर्ने क्षमता यो टिमले राख्छ । यसमा व्यवसायी अलमलिएको मैले पाएको छैन ।

यस पटक नेपाल लोकतान्त्रिक वैदेशिक रोजगार व्यवसायी एसोसिएसनको पूर्वअध्यक्ष भइसकेको व्यक्तिले संस्थागत निर्णयका विरुद्ध गएर अराजकतालाई टेवा दिएको टिप्पणी सुनियो ? यसमा के भनाइ छ ?

तपाईंले उठाउनुभएकोे आरोप र प्रश्न मैले पनि सुनेको छु । एसोसिएसन नेपाली कांग्रेसको शुभेच्छुक संस्था हो । मसमेत साथीहरूको मिहिनेतमा यो संस्था स्थापना भएको हो । लोकतान्त्रिकको इतिहासमा म संघको अध्यक्षको उमेदवार बन्दा नेपाली कांग्रेसबाट आधिकारिक पत्र आएको हो । नेपाली कांग्रेसले मलाई आधिकारिक उम्मेदवार भनेर रेकोगनाइज गरेकोे हो ।

उक्त निर्णयपछि केही साथीहरूले मान्छु भनेर सहीछाप गर्नुभयो । तर, अन्यत्र गएर उम्मेदवार बन्नुभयो । ती साथीहरू अहिले नेतृत्व भनेर हिँडिरहनुभएको छ । त्यसमा पनि यस पटक के भयो भने एउटा समुदायको राष्ट्रिय चाड ल्होसारको बिदाको दिन मध्यरातमा अनायास निर्णय गरियो, किन त्यसरी निर्णय गरियो अहिलेसम्म स्पष्ट जानकारी छैन । त्यही पनि मिलेर जाऊँ भनेर पटक–पटक छलफल गरियो तर मान्नुभएन । 

अहिले स्पष्ट भयो– उहाँहरू सिन्डिकेटको ग्रान्ड डिजाइनमा हुनुहुँदो रहेछ । प्राविधिक बहुमत देखाएर निर्णय लाद्ने षड्यन्त्र देखियो । विगतमा पनि नेपाल लोकतान्त्रिक वैदेशिक रोजगार व्यवसायी एसोसिएसनको अध्यक्ष हुँदा सिन्डिकेट लाग्यो, त्यो मान्छे को हो, सबैलाई थाहा छ ।

अहिले प्राविधिक नेतृत्वमा रहेका साथीहरूको योगदान र आचरण परीक्षणको घेरामा परेको छ । प्राविधिक बहुमतले संस्थाको आदर्श मार्न पाइँदैन । अर्कातर्फ अहिलेको राष्ट्रिय राजनीतिको परिवेश केन्द्रमा नेपाली कांग्रेस र नेकपा एमालेको सरकार छ । अन्य साना पार्टी सहभागी छन् ।

नेपाल पत्रकार महासंघ र नेपाल बार एसोसिएसनमा दुवै पक्ष सहमतिमा उम्मेदवार बनेर आएको अवस्था छ । अहिलेको सरकारमा महत्त्वपूर्ण जिम्मेवारीमा रहनुभएका आदरणीय गृहमन्त्री रमेश लेखकज्यूसँग छलफल हुँदा पनि एमालेसँग तलदेखि माथिसम्म मिलेर जाने र अन्यलाई समेट्न भनिएको हो ।
तर, प्राविधिक बहुमतमा रहेकोे नेतृत्वले पार्टीको निर्देशन लत्याएर गणतान्त्रिक मञ्चसँग तालमेल गर्‍यो । यसरी हुँदैन, सिन्डिकेट लागू गर्नेलाई किन अगाडि बढाइयो । संस्थालाई बचाउन यस पटक कठोर निर्णय गर्नुपरेको हो ।

संघका वर्तमान अध्यक्ष मूलतः सेवा शुल्क परिमार्जन, मागपत्र प्रमाणीकरणको समस्या समाधान, व्यवसायीविरोधी ऐेन कानुन खारेजी र भवन निर्माणको चुनावी प्रतिबद्धतामा निर्वाचित भएका हुन् । बल्लतल्ल भवन खरिद भयो । त्यो पनि पूरै टुंगिएको छैन । यस्तो अवस्थामा वर्तमान कार्यसमितिमाथि तपाईंको यति धेरै भरोसाको आधार के हो ?

जोसँग हामीले मिलेर प्यानल बनाएका छौं, त्यो पार्टीको नीति र व्यवसायीको हितमा छ ।

तपाईंको भनाइका बाबजुद आफूहरूलाई जीवनभर कांग्रेसी मतदाता मान्नेहरू अन्योलमा छन् । के भन्नुहुन्छ ?

अन्योल केही छैन । मैले नेपाल पत्रकार महासंघ र नेपाल बार एसोसिएसनको उदाहरण दिएर भनिसकें । सिन्डिकेट रोक्न र संघलाई प्रभावकारी बनाएर व्यवसायीका समस्या समाधान गर्न प्रगतिशील वैदेशिक रोजगार व्यवसायी मञ्च नेपाल, नेपाल लोकतान्त्रिक वैदेशिक रोजगार व्यवसायी एसोसिएसनको टिम र एकीकृत वैदेशिक रोजगार व्यवसायी संगठनबीच तालमेलमा बनेको नरेश गेलाल प्यानललाई मतदान गर्न मेरो आह्वान छ ।