भरत प्रधान/रासस
लिस्बन : पोर्चुगलमा सम्पन्न २१औं विश्व केम्पो च्याम्पियनसिपमा नेपाली खेलाडीले अन्तर्राष्ट्रिय पदक हात पार्दै नयाँ कीर्तिमान कायम गर्न सफल भएका छन् ।
पोर्चुगलको काल्दास दा रेन्हामा आइतबार सम्पन्न भएको विश्व च्याम्पियनसिपमा सहभागी नेपाली खेलाडीले २ रजत र ५ कांस्य पदकसहित नेपाललाई ७ अन्तर्राष्ट्रिय पदक दिलाउँदै नयाँ कीर्तिमान कायम गर्न सफल भएका हुन् । च्याम्पियनसिपमा नेपालको प्रतिनिधित्व गर्दै सहभागी केम्पो खेलाडी विपेश थापाले १ रजत र ३ कांस्य पदकसहित ४ पदक जित्न सफल भए । थापाले सेमी केम्पो फाइटिङ ७० केजी समूह, सेमी केम्पो सिनियर ५० केजी समूह, केम्पो-को ६० केजी तौल समूह, सबमिसन केम्पो ६० केजी तौल समूह अन्तर्गतको छुट्टाछुट्टै प्रतिस्पर्धामा विदेशी खेलाडीलाई पराजित गर्दै ४ वटा पदक जितेका हुन् ।
थापाले नेपालका लागि विश्व केम्पो च्याम्पियनसिपमा पहिलोपटक पदक जितेका हुन् । त्यसैगरी अर्का केम्पो खेलाडी अञ्जना शाहीले पनि १ रजत र २ कांस्य पदकसहित ३ पदक जित्न सफल भएकी छन् । शाहीले सेमी केम्पो ५५ केजी समूह, फुल केम्पो सिनियर ६० केजी समूह, सेमी केम्पो सिनियर ५० केजी समूहअन्तर्गतको छुट्टाछुट्टै प्रतिस्पर्धामा विदेशी खेलाडीलाई पराजित गर्दै ३ वटा पदक जितेकी हुन् । शाहीले पनि नेपालका लागि विश्व केम्पो च्याम्पियनसिपमा पहिलोपटक पदक जितेकी हुन् । थापा र शाही दुवै नेपाल केम्पो खुकुरी महासंघमा आबद्ध पाँचौं डान श्रेणीका खेलाडी हुन् ।
विश्व केम्पो च्याम्पियनसिपमा नेपाली खेलाडीले उत्कृष्ट खेल प्रदर्शन गर्दै २ रजत र ५ कांस्यपदकसहित ७ पदक जित्न सफल भएको नेपाल केम्पो खुकुरी महासंघका अध्यक्ष पाभेल शाहले जानकारी दिए । नेपाली केम्पो खेलको इतिहासमै यो अन्तर्राष्ट्रिय पदक पहिलो भएको अध्यक्ष शाहले बताए । 'हाम्रा खेलाडीले विदेशी खेलाडीसँगको प्रतिस्पर्धामा उत्कृष्ट खेल प्रदर्शन गर्दै पदक जित्न सफल भए । विश्वमाझ नेपालको नाम चम्काउन र नेपाली झण्डा फहराउन सफल भए । यो राष्ट्रकै लागि ठूलो उपलब्धि हो,' शाहले भने, 'अन्तर्राष्ट्रिय प्रतिस्पर्धामा प्राप्त यो सफलता नेपाल र नेपालीका लागि गौरवको विषय हो । नेपाली खेल क्षेत्रका लागि एउटा ऐतिहासिक उपलब्धि हो ।' अध्यक्ष शाहका अनुसार उक्त प्रतियोगितामा थापा र शाहीसहित अन्य तीन खेलाडी गरी नेपालको तर्फबाट ५ खेलाडीले च्याम्पियनसिपमा भाग लिएका थिए ।
यसअघि नेपालले सन् २०२४ मा पहिलोपटक विश्व क्याम्पो च्याम्पियनसिपमा भाग लिएको थियो । पहिलोपटक विश्व च्याम्पियनसिपमा सहभागिता जनाएको नेपालले पदक भने हात पारेको थिएन । यसपटक भने थापा र शाहीको उत्कृष्ट खेल कौशलले ऐतिहासिक सफलता हात पार्दै पदक जित्न सफल भएको हो ।
प्रतियोगितामा सहभागी हुन नेपाल केम्पो खुकुरी महासंघका अध्यक्ष पाभेल शाहको नेतृत्वमा नेपाली टोली पोर्चुगल आइपुगेको थियो । टोलीमा महासंघका प्रमुख सल्लाहकार बलदेव तिमल्सिना, बिदेश विभाग प्रमुख डा. विकास सुवेदी, महासचिव शर्मिला कार्की, केम्पो खेलाडी विपेश थापा, अर्का खेलाडी अञ्जना शाही लगायतका खेलाडीको सहभागिता रहेको थियो । २२ अप्रिलदेखि सुरु भएको प्रतियोगितामा विश्वभरका १०८ देशका खेलाडीको सहभागिता थियो ।
२१औं विश्व केम्पो च्याम्पियनसिपमा जित हासिल गरेसँगै विपेश थापा केम्पो च्याम्पियनसिपको अन्तर्राष्ट्रिय पदक जित्ने पहिलो नेपाली खेलाडी बनेका छन् । प्रतियोगितामा थापाले १ रजत र ३ कांस्य पदकसहित ४ पदक जित्दै विश्वमाझ नेपालको नाम चम्काउन सफल भए । पाँचखाल–१०, काभ्रेपलाञ्चोकका थापा ५ डान श्रेणीका खेलाडी तथा प्रशिक्षक हुन् । उनी दक्षिण एसियाली प्रतियोगिताहरूमा समेत नेपालको प्रतिनिधित्व गर्दै सहभागिता जनाइसकेका मार्सल आर्टका खेलाडी हुन् ।
त्यसैगरी सोही च्याम्पियनसिपमा जित हासिल गरेसँगै केम्पो खेलाडी अञ्जना शाही केम्पो च्याम्पियनसिपको अन्तर्राष्ट्रिय पदक जित्ने पहिलो नेपाली महिला खेलाडी बनेकी छन् । मण्डनदेउपुर–८, काभ्रेपलाञ्चोककी शाही ५ डान श्रेणीका खेलाडी तथा राष्ट्रिय प्रशिक्षकसमेत हुन् ।
