काठमाडौं : त्रिभुवन अन्तर्राष्ट्रिय विमानस्थलको अध्यागमन कार्यालयमा अख्तियार दुरुपयोग अनुसन्धान आयोगको टोलीले छापा मारेको छ । धेरै पैसा असुल गरी भिजिट भिसामा विदेश पठाउने गरेको उजुरी आउन थालेपछि अख्तियारले अध्यागमन कार्यालयमा छापा मारेको हो ।
अख्तियारको टोलीले विभागको कम्प्युटर तथा विभिन्न डिभाइसहरू नियन्त्रणमा लिएको छ ।
यसबीच अख्तियारले गृहमन्त्रालयका सहसचिव तीर्थराज भट्टराईलाई नियन्त्रणमा लिएको छ ।
भट्टराईलाई गृह मन्त्रालयले मंगलबार मात्रै बढुवा गरेर गृहमन्त्रालयमा झिएको थियो । यसअघि उनी त्रिभुवन अन्तर्राष्ट्रिय विमानस्थल कार्यालयका प्रमुख अध्यागमन अधिकृत थिए । उनको ठाउँमा पाँचथरका प्रमुख जिल्ला अधिकारी रहेका विष्णु कोइरालालाई पठाइएको छ ।
यसअघि एलडीओ हुँदा पनि भट्टराईमाथि भ्रष्टाचार मुद्दा लागेको थियो । उनी पटकपटक विवादमा पर्दै आएका व्यक्ति हुन् ।
