यति बेला हरेक नागरिकको एउटै समस्या र चिन्ता छ– कोभिड महामारीबाट कसरी बच्ने ? नयाँ वर्षको शुरुवातसँगै डढेलो जसरी समुदायस्तरमा फैलिएको कोरोना महामारीबाट जीवन गुमाउनेको संख्या बढेसँगै हरेक नागरिकलाई अत्याएको छ । निषेधाज्ञाले घरभित्र थुनिएकाले मात्रै होइन, दैनिक उपभोग्य सामग्री खरीद गर्ने र अत्यावश्यकीय काममा निस्केर घर पुग्दाको अवस्थाले पनि आम नागरिक उकुसमुकुस बनेका छन् । विशेषगरी राजधानी उपत्यका र पश्चिम नेपालको अवस्था आक्रान्त बनेको छ । लुम्बिनी प्रदेशका अस्पतालहरुमा अक्सिजनको अभावमा मृत्यु हुनेको संख्या सुनेर हरेक नागरिक मनोवैज्ञानिक रुपमै संक्रमित देखिने अवस्था बनेको छ । निषेधाज्ञा लम्बिदै जाँदा न्यून आय भएका परिवारका अभिभावक निदाउने नसक्ने अवस्थामा पुगेका छन् । अझ संक्रमण भइरहालेमा जीवन भगवान भरोसामा पर्नुपर्ने चिन्ता उस्तै छ । किनभने, राजधानी उपत्यकाका सरकारी मात्रै नभएर नीजि अस्पतालहरुमा पनि अक्सिजन लगायत स्वास्थ्य उपकरण र वेडको अभाव खड्किएको छ । संक्रमणपछि घरमै बसेकाहरुको चिन्ता अझ बढी छ ।
त्यसैले मुलुकको विद्यमान चिन्ता र चासो एउटै हो– कसरी जीवन जोगाउने ? संसारभरले नेपाली नागरिकको जीवन कसरी जोगिन्छ भन्नेतिर ध्यान दिइरहेको छ । अन्तर्राष्ट्रिय निकाय आफैले नेपालबारे चासो देखाइरहेका छन् । तर विश्वब्यापी महामारी भएकाले उनीहरुले पनि पर्याप्त र सहज रुपमा सहयोग गर्ने अवस्था देखिदैन । त्यसैले नेपाल सरकार, प्रदेश सरकार र स्थानीय सरकारको मात्रै नभएर आम नागरिक, सचेत पंक्ति लगायतको ध्यान नागरिकको जीवन रक्षामा जानुपर्ने हो । तर विडम्बना ! नेपालमा अहिले कोरोना महामारी मात्रै चासो र चिन्ताको विषय बनेको छैन । स्वयम् सरकार नै आईसीयूमा पुगेको छ । वैशाख २७ मा प्रधानमन्त्री केपी शर्मा ओलीले संसद्को विश्वासको मत गुमाएका छन् ।
तर लगत्तै अर्को सरकार बनेर नागरिकको जीवन रक्षामा लाग्ने संभावना देखिन्न । किनकि अहिले जस्तो विकृति नागरिक अभ्यास भइरहेको छ, यसले सामान्य गणित वा अनुमान बिफल हुने संकेत देखिन्छ । अझ प्रदेश सरकारहरुमा सांसद तानातान, राजीनामा र दल परिवर्तन जस्ता विकृत अभ्यास भइरहेका छन् । विपक्षमा रहेकाहरु सत्तमा पुग्ने र सत्तामा भएकाहरुले कुनैहालतमा नछोड्ने जस्तो खेलमा रहेकाले मुलुकको ध्यान कोरोना महामारी भन्दा पनि नेतृत्वबारे तानिएको छ । यो दुखद् अवस्था हो, र निन्दनीय कदम पनि । यसर्थ जतिसक्दो चाँडो नागरिकको जीवनरक्षामा लाग्नुको अर्को विकल्प छैन ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies