काठमाडौं : भारतीय कामदारले नेपालबाट हुने चार्टर्ड फ्लाइटको दुरुपयोग गरिरहेको आशंका बढेको छ । भारतमा तीव्र गतिमा कोरोना भाइरसको दोस्रो लहर बढेका कारण खाडी मुलुकले उडान रोकेपछि ती मुलुकमा रोजगारीमा जाने भारतीय कामदारहरुले नेपाललाई ट्रान्जिट बनाएर उड्ने गरेका थिए ।
नेपाली सञ्चारमाध्यममा त्यस विषयमा समाचार तथा टिप्पणी आएपछि गृहमन्त्रालयले निगरानी राख्न अध्यागमनलाई निर्देशन दिएपछि भारतीय कामदारहरु उड्ने क्रममा कमी आएको थियो । तर हाल नेपालले जारी राखेका चार्टर्ड फ्लाइटमा ठूलो संख्यामा भारतीय कामदारहरु उड्ने गरेको विमानस्थल स्रोतले बतायो । भारतमा कोरोना संक्रमण तीव्ररुपमा बढेपछि खाडीका अधिकांश देशले रोकेको भारतीय उडान सुचारु गरेका छैनन् । खाडी मुलुकहरुमा कोरोना संक्रमण बिस्तारै कम हुँदै गएपछि ती देशमा आर्थिक गतिविधि बढ्दा विदेशी कामदारहरुको माग बढ्न थालेको छ ।
खाडी मुलुकहरुले भारतबाट हुने चार्टर्ड उडान समेत रोकेपछि रोजगारीका लागि खाडी मुलुक जाने भारतीय कामदार काठमाडौं आई कोरोना परीक्षण गराई जाने गरेका छन् । नेपालले अन्तर्राष्ट्रिय उडान आगामी जेठ १७ गतेसम्म स्थगित गरेको छ ।
तर कोरोनाको संक्रमणका बेला पनि नेपाल भारतबीच एयर बबल अनुसार सातामा दुई उडान चालू रहेका छन् । भारतीय नागरिकहरु ती उडानबाट काठमाडौं आई पीसीआर परीक्षण गराई खाडीका विभिन्न मुलुक जाने गरेको विमानस्थल अध्यागमन स्रोतले बतायो । उनीहरुले कोरोना परीक्षणको नेगेटिभ रिपोर्ट लिएर नेपाल आउने गरेपनि भारतमा दलालहरुले कोरोना परीक्षणको नेगेटिभ रिपोर्ट परीक्षण बिना नै होटल–होटल ल्याइदिने गरेको चर्चा भारतीय सञ्चारमाध्यमहरुमा आइरहेका छन् ।
काठमाडौंमा संक्रमण विस्तार हुनुमा खाडी मुलुक जान आएका भारतीय नागरिकहरु पनि प्रमुख कारणका रुपमा रहेको कतिपयको आंकलन छ । यसअघि सुरिया हेल्थ केयर र मेरिट मल्टिकेयर सेन्टरले जारी गरेका स्वास्थ्य प्रतिवेदनको छानविनको क्रममा त्रिभुवन अन्तर्राष्ट्रिय विमानस्थलबाट फर्काइएका १ सय ७२ यात्रुमध्ये ६८ भारतीय नागरिक थिए । यस पटक उनीहरुले ह्याम्स अस्पतालमा परीक्षण गराउने गरिएको बताइएको छ । विमान कम्पनीहरुले अन्तर्राष्ट्रिय उडानका लागि ७२ घण्टाभित्र गरिएको कोरोना परीक्षणको रिपोर्ट अनिवार्य गरेका छन् ।
विगत एक वर्षदेखि नेपालमा नियमित अन्तर्राष्ट्रिय उडानहरुमा कम भएको, केही अन्तर्राष्ट्रिय विमान कम्पनीहरुले नेपालका उडानहरु बन्द गरेको र भारतीय कामदारहरु समेत नेपालको अन्तर्राष्ट्रिय विमानस्थल प्रयोग गरी विदेशिने क्रम बढेपछि चार्टर्ड विमानको भाडासमेत अपत्यारिलो ढंगले वृद्धि भएको छ । भारतीय नागरिकहरुको अवैध यात्रा नरोके नेपालबाट हुने चार्टर्ड फ्लाइट शंकाको घेरामा पर्ने र नेपालबाट साउदी अरब लगायतका खाडी देशमा हुने चार्टर्ड फ्लाइट रोकिन सक्ने खतरा रहेको बताइएको छ ।
कोरोना भाइरसको दोस्रो लहर बढेपछि साउदी अरब र यूएई लगायतले गत फेब्रुअरी महिनाको पहिलो सातादेखि भारतसहित १३ मुलुकबाट हुने प्रत्यक्ष वा अप्रत्यक्ष प्रवेशमा रोक लगाउने नयाँ निर्णय गरेको थियो । १३ मुलुकको नकारात्मक सूचीमा नेपालको नाम भने छैन । साउदी अरबको सिभिल एभिएसन अथोरिटीले परिस्थितिमा सुधार आएमात्र उडान प्रतिबन्ध हटाउने बताएको छ ।
नेपाल वैदेशिक रोजगार व्यवसायी संघका पूर्वअध्यक्ष बलबहादुर तामाङ भारतीय नागरिक उड्ने अवस्थाले नेपालीलाई प्रतिबन्ध लाग्न सक्ने हुँदा विदामा घर आएका र नयाँ कामदार जान नपाउने बताउँछन् । आफ्नो फेसबुक पेजमा उनले लेखेका छन्, ‘नेपालीहरु लकडाउनमा घरमा बस्नु पर्ने तर सस्कृति, पर्यटन तथा नागरिक उड्डयन मन्त्रालयले भारतीयहरुलाई काठमाडौं त्रिभुवन विमानस्थल प्रयोग गरेर साउदी अरब जान हप्ताको १० उडान गर्न दिनु गलत हो । उनीहरुमा साउदी पुग्दा कोभिड देखिएमा नेपाललाई साउदीले कालो सूचीमा राख्ने खतरा छ । नेपालबाट आफ्नो देश भारतमा लान दिने तर तेस्रो मुलुकमा पठाउन रोक्नुपर्छ ।’
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies