प्रधानमन्त्री केपी शर्मा ओलीले तेस्रो कार्यकालका लागि गएको ३० वैशाखमा लिएको शपथ विवादित बनेको छ । राष्ट्रपति विद्यादेवी भण्डारीले शपथ गराउँदा प्रधानमन्त्री ओलीले शब्द छुटाउनुका साथै उल्टै ‘त्यो पर्दैन’ भनेका थिए । त्यसलाई राष्ट्रपति भण्डारीले पनि गम्भीर नलिएर उल्टै हाँसेकी थिइन् । प्रधानमन्त्री ओलीले ‘प्रतिष्ठा गर्छु’ भन्ने शब्द नभनेर ‘त्यो पर्दैन’ भन्दा राष्ट्रपति भण्डारीले हाँसेकी थिइन् । शपथमा प्रयोग यी शब्द र छुटेको वाक्यांश प्रति विरोध भइरहेको छ । राष्ट्रपति भण्डारी र प्रधानमन्त्री विरुद्ध सर्वोच्च अदालतमै मुद्दा परेको छ । मुद्दाको सुनुवाइ गर्दै सर्वोच्चले पनि लिखित जवाफ मागेको छ । प्रधानन्यायाधीश चोलेन्द्र शमशेर राणाको इजलासले लिखित जवाफ मागेको हो । यो मुद्दामा धेरैले भने पुनः शपथ गराउनुपर्ने तर्क गरेका थिए । तर अदालतले त्यस्तो फैसला नगरी लिखित जवाफ मागेको छ ।
हुन त यसअघिका कम्युनिष्ट प्रधानमन्त्रीहरुले पनि शपथको वाक्यांश छुटाउने गरेका थिए । देश, ईश्वर र जनताको नाममा शपथ लिनुपर्नेमा देश र जनताको नाममा शपथ लिने गरेका थिए । गणतन्त्र स्थापना भएपछि लगभग सवैजसो कम्युनिष्ट प्रधानमन्त्रीले शपथको यो व्यहोरा छुटाउने गरेका छन् । तर आम सहमति रहेकाले त्यस्तो शपथ विवादित नभएर एउटा पंक्ति (कम्युनिष्ट) बाट प्रशंसा हुने गरेको हो । प्रधानमन्त्री ओलीले पनि यसअघि दुई पटक शपथ लिंदा ‘ईश्वर’ भनेका थिएनन् । यसपटक पनि भनेनन् । तर राष्ट्रपतिलाई नै सिकाउनेगरी बोलेपछि भने विवादित बन्न पुगे । यसको अन्तिम फैसला न्यायलयबाटै हुनेछ ।
तर यो विषय गम्भीर रुपमा भने रहनेछ । किनभने संविधानविद्हरुले यसलाई ‘संविधानको बर्खिलाप र राष्ट्रपतिको अपमान’का रुपमा अथ्र्याएका छन् भने राष्ट्रपतिमाथि संविधान मिचेको आरोप लगाइएको छ । यदि यो कथ्य स्थापित हुने हो भने संविधानवाद् भने कमजोर हुनेछ । शपथका शब्दहरु हुबहु उच्चारण गर्नुको अर्थ संविधानको शासन मान्छु भन्ने अर्थमा परिभाषा स्थापित हुने हो भने राष्ट्रपति र प्रधानमन्त्रीले संविधान मानेनन् । यदि, राष्ट्रपति र प्रधानमन्त्रीले नै संविधान मान्दैन भन्ने भाष्य स्थापित हुने हो भने राजनीतिक उपलब्धी र व्यवस्था पनि संकटमा पर्न सक्छ । अतः यस्ता विषयमा हुने फैसला अनि सम्बन्धित पक्षले लिने निर्णयमा गम्भीरता अपनाउन जरुरी छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies