सुर्खेत : सुर्खेत विमानस्थललाई गुणस्तरीय र प्रभावकारी बनाउन विमानस्थल विस्तार र थप पूर्वाधार विकास गरिने भएको छ । बुधबार प्रदेश प्रमुख तिलक परियारले आगामी आर्थिक वर्ष २०८१/०८२ को नीति तथा कार्यक्रम प्रस्तुत गर्दै सो कुराको जानकारी गराएका हुन् ।
उनले संघीय सरकारसँगको सहकार्यमा सुर्खेत विमानस्थललाई गुणस्तरीय र प्रभावकारी बनाउन विमानस्थल विस्तार र थप पूर्वाधार विकास गरिने जानकारी दिए ।
यस्तै प्रदेशभित्रको हवाई क्षेत्रलाई भरपर्दो, सुलभ र सहज बनाउन सुर्खेत विमानस्थललाई केन्द्र बनाएर प्रदेशभित्र र अन्य प्रदेशका विमानस्थलमा समेत हवाई उडान नियमित गर्न पहल गरिने उनले बताए । यसका लागि हवाई सेवा प्रदायकहरुलाई आवश्यकता अनुसार सहुलियत प्रदान गरिने, सुर्खेतको बुलबुलेतालबाट काँक्रेबिहार हुँदै निकाससम्म जलबिहारसहितको बहुउद्देश्य परियोजनाको सम्भाव्यताको अध्ययन गरिने भएको छ ।
कृषि जैविक विविधता संरक्षण र प्रवर्द्धन गर्न सम्भाव्यताका आधारमा डोल्पामा मौरी विकास, दैलेखमा बाख्रा विकास र सल्यानमा सुन्तला जात फलफूल विकास फार्म तथा केन्द्रको स्थापना गरिने उनले बताए ।
