रौतहट : मोबाइल चोरीको आरोपमा कुटपिटबाट एक युवकको मृत्यु भएको घटनामा प्रहरीले चार जनाविरुद्ध कर्तव्य ज्यान मुद्दा दर्ता गरी अनुसन्धान अघि बढाएको छ ।

रौतहटको कटहरिया नगरपालिका–४ बहादुरपुरका २८ वर्षीय नसिव बैठाको मृत्यु भएपछि पीडित परिवारले उजुरी दिएको थियो । त्यसकै आधारमा इलाका प्रहरी कार्यालय गरुडाले स्थानीय ३२ वर्षीय गर्भुदयाल सर्भङ्गलाई पक्राउ गरेको छ भने बाँकी तीन जना फरार छन् ।

पीडितका भाइ दर्शन बैठाका अनुसार साउन १६ गते कटहरिया बजारस्थित खाजा पसलमा गर्भुदयालले आफ्नो मोबाइल चोरी भएको आरोप लगाउँदै नसिवलाई कुटपिट गरेका थिए । भोलिपल्ट १७ गते भने स्थानीय सञ्जय यादव र उनका भाइ विजय यादवले पनि मोबाइल चोरी गरेको भन्दै नसिवलाई गाउँनजिकैको आँपबारीमा लगेर कुटपिट गरेको आरोप परिवारले लगाएको छ ।

उनका अनुसार कुटपिटकै क्रममा नसिवलाई आँपको रुखमा उल्टो झुन्ड्याएर पनि यातना दिइएको थियो । घटनाबारे जानकारी पाएपछि प्रहरी पुगेको थियो र उनलाई उद्धार गरी उपचारका लागि पठाइएको थियो । तर अवस्था बिग्रिँदै गएपछि वीरगञ्जस्थित नेशनल मेडिकल कलेजमा उपचारका क्रममा भदौ ११ गते उनको मृत्यु भएको हो ।

घटनाबारे जानकारी दिँदै जिल्ला प्रहरी कार्यालय रौतहटका डिएसपी राजन कार्कीले प्रारम्भिक अनुसन्धानपछि चार जनाविरुद्ध मुद्दा दर्ता भएको बताए । उनका अनुसार पक्राउ परेका गर्भुदयालमाथि कारबाही प्रक्रिया अघि बढाइएको छ भने अन्य तीनजनाको खोजी जारी छ ।