काठमाडौंः थाइल्याण्डका विदेशमन्त्री सिहासाक फुआङ्केटकेओले विशेष आसियान विदेश मन्त्रीहरूको बैठकपछि थाइल्याण्डले थाइल्याण्ड–कम्बोडिया युद्धविरामको छलफल पुनः सुरु हुने बताएका छन् ।

युद्धविरामको विवरणहरू डिसेम्बर २४ मा कम्बोडियासँग अर्को बैठकमा थप छलफल गर्ने बताएका हुन् । चालु द्वन्द्वलाई सम्बोधन गर्न आयोजित विशेष बैठकपछि पत्रकार सम्मेलनमा सिहासाकले थाइल्याण्डले छिमेकी देशहरूमा शान्तिको लागि सधैं प्रयास गरेको र यो मुद्दालाई द्विपक्षीय माध्यमबाट समाधान गर्न चाहेको बताए । उनले युद्धविरामसम्बन्धी छलफलहरू जनरल बोर्डर कमिटी (जीबीसी) को ढाँचामा हुने र बैठक डिसेम्बर २४ मा निर्धारित भएको जानकारी दिए ।

क्षेत्रीय समूह आसियानले तनाव न्युनिकरण गर्न प्रयास गरिरहेका बेला थाइल्याण्ड–कम्बोडिया द्वन्द्वलाई सम्बोधन गर्न सोमबार कुआलालम्पुरमा विशेष आसियान विदेश मन्त्रीहरूको बैठक आयोजना भएको थियो । बैठकपछि आसियानले दुवै देशलाई अधिकतम संयम अपनाउन र शत्रुता तत्काल रोक्न आग्रह गरेको छ ।

यो बैठकले जुलाईमा भएको युद्धविरामलाई पुनः कार्यान्वयन गर्न र अक्टोबरमा हस्ताक्षरित कुआलालम्पुर संयुक्त घोषणालाई पूर्ण रूपमा पालना गर्न आग्रह गरेको छ । डिसेम्बर २४ को जीबीसी बैठकमा युद्धविरामको कार्यान्वयन र प्रमाणीकरणबारे छलफल हुने अपेक्षा गरिएको छ । थाइल्याण्ड र कम्बोडियाबीच लामो समयदेखि सीमा विवाद रहेको छ । जसका कारण यस वर्ष जुलाईमा र डिसेम्बरमा पुनः हिंसात्मक द्वन्द्व भड्किएको छ । दुवै पक्षले एकअर्कालाई आक्रमणको आरोप लगाएका छन् ।