मुकुन्द लामिछाने/मध्यान्ह
काठमाडौं : शुक्रबार देशभर स्थानीय तहको चुनाव सम्पन्न भएको छ । निर्वाचन आयोगका अनुसार छिटपुट घटनाबाहेक मतदान शान्तिपूर्ण र उत्साहजनकरूपमा सम्पन्न भएको छ ।
निर्वाचन आयोगका प्रमुख निर्वाचन आयुक्त दिनेशकुमार थपलिया छिटपुट घटनाले केही खल्लो बनाएको बताउँछन् । तथापि, समग्रमा मतदान शान्तिपूर्ण हुनु ठूलो सफलता भएको उनी बताउँछन् । ‘छिटपुट घटनाले केही खल्लो बनाए पनि समग्रमा मतदान शान्तिपूर्ण हुनु ठूलो सफलता हो ।’
देशभरका ७५३ पालिकाका २२ हजार बढी मतदान केन्द्रमा शुक्रबार एकसाथ मतदान भएको थियो । आयोगका प्रवक्ता एवं सहसचिव शालिग्राम शर्मा पौडेलका अनुसार केही स्थानमा दल र उम्मेदवारहरूका कारण विवाद भई मतदान अवरुद्ध भयो । कतिपय स्थानमा मतपत्र च्यातिएको छ भने कतिपय ठाउँमा मतपेटिका तोडफोड भएको छ । सुरक्षा कमजोरीका कारण राजनीतिक दलका कार्यकर्ता अराजक भएको निर्वाचन आयोगको निष्कर्ष छ ।
राजनीतिक ध्रुवीकरण चर्को भएकाले पनि समस्या भएको आयोगको निष्कर्ष छ । यसले मत नै कम खसेको भन्दै आयोगका अधिकारीहरुले बताएका छन् ।
यद्यपि प्रमुख निर्वाचन आयुक्त थपलियाले आम रुपमा शान्तिपूर्ण वातावरणमा सम्पन्न भएको बताएका छन् । तर कतिपय ठाउँमा उम्मेद्वारहरुको विवाद, सामान्य विषयमा पनि विवाद झाँगिंदै जाँदा मतदान स्थलहरुमा झडप तथा तनाव भएको उनले बताए ।
आयोगका अनुसार जुम्ला, सप्तरी, काभ्रे, रौतहट, रामेछाप, बारा, बाजुरा, पर्वतलगायत जिल्लाका केही मतदानस्थलमा विवाद भएका कारण मतदान कार्य अवरुद्ध भएको थियो ।
आयोगका अनुसार ६५ वटा राजनीतिक दलले चुनावमा भाग लिए । ५५ हजार ६९८ जना महिला र ८९ हजार ३१३ जना पुरुष गरी विभिन्न राजनीतिक दल र स्वतन्त्र उम्मेद्वारसमेत जम्मा एक लाख ४५ हजार ११ जना चुनावी प्रतिस्पर्धामा छन् ।
७५३ स्थानीय तहको बिभिन्न ३५ हजार २२१ पदका लागि आज मतदान भएको हो । जसमध्ये ३५५ जना विभिन्न पदाधिकारीमा निर्विरोध निर्वाचित भैसकेका छन् ।
चुनावमा पाँच दलीय सत्तागठबन्धनले तालमेल गरेका छन् । कतिपय ठाउँमा एक्ला एक्लै पनि चुनावी प्रतिस्पर्धा गरेका छन् भने नेकपा एमालेले पनि साना दलहरुसँग चुनावी तालमेल गरेको छ । पाँच दलीय गठबन्धनले ६ वटा महानगर र ११ वटा उपमहानगर पालिकामा केन्द्रबाट नै तालमेल गरेको छ भने नगरपालिका र स्थानीय तहमा स्थानीय स्तरबाटै तालमेलको प्रयास गरेको छ । तथापि, कांग्रेसले ७५० स्थानीय तहको प्रमुखमा उम्मेद्वारी दिएको छ भने नेकपा माओवादी केन्द्र र नेकपा एकीकृत समाजवादीले पनि कतिपय ठाउँमा एक्लै चुनावी प्रतिस्पर्धा गरेको छ । कतिपय ठाउँमा नेकपा एमाले र कांग्रेस, नेकपा एमाले र माओवादी केन्द्रबीच समेत तालमेल भएको छ । एमालेले राप्रपा लगायतका साना दलहरुसँग पनि छुट्टाछुट्टै तालमेल गरेको छ ।
आयोगका प्रवक्ता शर्माका अनुसार मतदान सम्पन्न भएर सुरक्षितरूपमा मतपेटिका मुख्य निर्वाचन अधिकृतको कार्यालयमा ढुवानी गरेर सर्वदलीय छलफलपछि सहरी क्षेत्रमा रातिदेखि मतगणना कार्य सुरु भएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies