काठमाडौँ : हृदयेश त्रिपाठीले जनता समाजवादी पार्टी, नेपाल र लोकतान्त्रिक समाजवादी पार्टीबीचको एकीकरण प्रक्रियाप्रति दुई बुँदामा वैचारिक असहमति प्रकट गरेका छन् ।

उनका अनुसार आफू प्रत्यक्ष निर्वाचित राष्ट्रपतीय प्रणाली तथा पूर्ण समानुपातिक निर्वाचन प्रणाली दुवै व्यवस्थाको पक्षमा नरहेको स्पष्ट पारेका छन् । त्रिपाठीले नेपालजस्तो बहुजातीय र विविध सामाजिक संरचना भएको मुलुकका लागि हालको संसदीय शासन प्रणाली र मिश्रित निर्वाचन प्रणाली उपयुक्त हुने धारणा राखेका छन् ।

सामाजिक सञ्जालमार्फत व्यक्त विचारमा उनले प्रत्यक्ष निर्वाचित राष्ट्रपतिको अवधारणा कम्युनिस्ट राजनीतिक वृत्तबाट आएको विचार भएको उल्लेख गर्दै त्यसले अल्पसंख्यक समुदायका लागि प्रतिकूल प्रभाव पार्न सक्ने दाबी गरेका छन् । त्यस्तै, पूर्ण समानुपातिक निर्वाचन प्रणालीमा सहमत हुन नसकिने उनले स्पष्ट पारेका छन् । सैद्धान्तिक आधार प्रष्ट नभई गरिएको एकता दीर्घकालीन रूपमा हानिकारक हुन सक्ने उनको भनाइ छ ।

यसैबीच, गत मंसिर २४ गते जनता प्रगतिशील पार्टी, तराई मधेश लोकतान्त्रिक पार्टी र लोकतान्त्रिक समाजवादी पार्टीबीच एकीकरण सम्पन्न भएको थियो । पछि पुस महिनामा लोकतान्त्रिक समाजवादी पार्टी र जनता समाजवादी पार्टी, नेपालबीच अर्को चरणको एकीकरण भएको र सो प्रक्रियालाई निर्वाचन आयोगले औपचारिक मान्यता दिएको बताइएको छ ।

त्रिपाठीले आफ्नो नेतृत्वको जनता प्रगतिशील पार्टी र तराई मधेश लोकतान्त्रिक पार्टीको पहलपछि पहिलो एकीकरण भएको र त्यसपछि मात्र थप दलहरूबीच एकता प्रक्रिया अघि बढेको दाबी गरेका छन् । तर पछिल्लो एकीकरण प्रक्रियामा आफू नेतृत्वको समूहलाई जानकारी नदिइएको उनको आरोप छ, जसका कारण तराई मधेश लोकतान्त्रिक पार्टी पछि अलग भएको उल्लेख छ ।

गत फागुन २१ मा भएको निर्वाचनमा उनी जनता समाजवादी पार्टी, नेपाल कै चुनाव चिह्न प्रयोग गरी नवलपरासी (बर्दघाट-सुस्ता पूर्व)-१ बाट उम्मेदवार बनेका थिए । उक्त निर्वाचनमा उनले ७ हजार ८२३ मत प्राप्त गरेका थिए ।

निर्वाचन आयोगबाट प्राप्त आधिकारिक मान्यतालाई भने उनले सकारात्मक विकासका रूपमा स्वीकार गरेको उल्लेख गरिएको छ ।