काठमाडौँ : राष्ट्रिय प्रजातन्त्र पार्टी (राप्रपा) की प्रमुख सचेतक खुस्बु ओलीले राजनीतिक नेतृत्वको बचाउ गर्ने नाममा राष्ट्रिय हित र सीमा सम्बन्धी विषयमा मुलुकको स्थापित अडान कमजोर पार्ने प्रयास हुन नहुने बताएकी छन् ।

मंगलबारको प्रतिनिधि सभा बैठकमा धारणा राख्दै उनले प्रधानमन्त्रीको हालैको सीमा सम्बन्धी अभिव्यक्ति कूटनीतिक, कानुनी तथा राष्ट्रिय सुरक्षासँग प्रत्यक्ष जोडिएको संवेदनशील विषय भएकाले त्यसलाई सामान्य टिप्पणीका रूपमा लिन नमिल्ने उल्लेख गरिन् ।

उनले प्रधानमन्त्री कुनै व्यक्तिगत व्यक्ति मात्र नभई राज्यको संस्थागत नेतृत्वको प्रतिनिधि भएकाले सार्वजनिक अभिव्यक्तिमा उच्च स्तरको जिम्मेवारी, सावधानी र कूटनीतिक परिपक्वता अपेक्षित हुने बताइन् । राज्यका उच्च पदाधिकारीबाट आउने भनाइले राष्ट्रिय तथा अन्तर्राष्ट्रिय स्तरमा प्रभाव पार्ने भएकाले यस्ता विषयमा विशेष सतर्कता आवश्यक रहेको उनको भनाइ थियो ।

ओलीले केही राजनीतिक वृत्तमा नेताले व्यक्त गरेका भनाइलाई जसरी पनि सही साबित गर्ने प्रवृत्ति देखिएको टिप्पणी गर्दै त्यसका लागि राष्ट्रिय दाबी र स्वाभिमानलाई कमजोर बनाउने प्रयास उचित नहुने धारणा राखिन् । सीमा, सार्वभौमिकता र राष्ट्रिय हितका विषय बहसका विषय हुन सक्ने भए पनि कुनै व्यक्तिको अभिव्यक्तिको प्रतिरक्षाका लागि मुलुककै पक्षलाई कमजोर बनाउने गतिविधि स्वीकार्य नहुने उनको तर्क थियो ।

उनले व्यक्ति पूजा र नेता केन्द्रित राजनीतिक संस्कृतिले दीर्घकालीन रूपमा लोकतान्त्रिक अभ्यासलाई कमजोर बनाउने चेतावनीसमेत दिइन् । राष्ट्रिय मुद्दामा दलगत वा व्यक्तिगत निष्ठाभन्दा माथि उठेर देशको हितलाई प्राथमिकता दिनुपर्नेमा उनले जोड दिइन् ।