काठमाडौँ : नेकपा (एमाले)का उपाध्यक्ष विष्णु पौडेलले वर्तमान ढाँचामा पार्टी सञ्चालनलाई निरन्तरता दिन नसकिने निष्कर्षमा नेतृत्व पुगेको बताएका छन् । उनले संगठनात्मक संरचना र कार्यशैलीमा पुनरावलोकनसहित पुनर्संरचनाको प्रक्रिया अघि बढाइने जानकारी दिएका छन् ।

सदस्यता नवीकरणसम्बन्धी कार्यशालामा धारणा राख्दै पौडेलले पार्टीलाई समयानुकूल र प्रभावकारी बनाउन संगठनात्मक जीवनमा आवश्यक सुधार तथा पुनर्गठन अपरिहार्य बनेको बताए । उनका अनुसार हालको अवस्थाको समीक्षा गर्दै आगामी रणनीति तय गर्ने तयारी भइरहेको छ ।

पौडेलले पार्टी सचिवालय बैठकले हालै सम्पन्न निर्वाचनको समग्र मुल्यांकन गर्न समीक्षा प्रतिवेदन तयार गर्ने तथा संगठन पुनर्संरचनासम्बन्धी प्रस्ताव निर्माण गर्न कार्यदल गठन गरेको जानकारी दिए ।

उनका अनुसार कार्यदलले तयार गर्ने प्रतिवेदन र सुझावमाथि सचिवालय तथा केन्द्रीय कमिटीमा थप छलफल गरिनेछ । त्यसपछि प्राप्त निष्कर्षका आधारमा संगठनात्मक पुनर्गठनसम्बन्धी निर्णय लिइने उनले बताए ।

एमाले नेतृत्वले निर्वाचनपछिको राजनीतिक तथा संगठनात्मक अवस्थाको समीक्षा गर्दै पार्टीलाई थप प्रभावकारी, जनमुखी र परिणाममुखी बनाउने उद्देश्यसहित आन्तरिक संरचनामा सुधारका विकल्पहरूबारे छलफल अघि बढाएको जनाएको छ ।