काठमाडौं : नेपाली कांग्रेसका सभापति गगनकुमार थापाले मुलुक अहिले सरकारको शासकीय अराजकताबाट आक्रान्त भएको आरोप लगाएका छन् । आइतबार पार्टी केन्द्रीय कार्यालयमा जारी केन्द्रीय कार्यसमिति बैठकलाई सम्बोधन गर्दै सभापति थापाले यस्तो आरोप लगाएका हुन् ।

उनले सरकारले विधिसम्मत प्रक्रिया र शक्ति पृथकीकरणको सिद्धान्तको सीमा नाघ्न थालेको आरोप पनि लगाए । उनले कार्यपालिकाले न्यायपालिकाको सीमासमेत आफूभित्र पर्ने गरी व्यवहार गर्न थालेको तथा संवैधानिक निकाय र संसदलाई समेत नमान्ने प्रवृत्ति दोहोरिएको भन्दै यस्ता कुरामा छुट दिन नहुने टिप्पणी गरे ।

उनले प्रधानमन्त्री वालेन्द्र शाहले भनेको ‘एक्सप्रेस वे’मा सरकार बिनाब्रेक चल्नसक्ने तर लेन मिच्न नपाउने टिप्पणी गरे ।

उनले गृहमन्त्री सुधन गुरुङको सम्पत्ति छानबिन प्रतिवेदन लुकाएको भन्दै आपत्ति समेत जनाए । सभापति थापले अहिले दिनदिनै मन्त्री र सत्तारुढ दलका सांसदहरुले हप्किदप्कि दिने गरेको कुराहरु बाहिर आइरहेको भन्दै यसले मुलुकलाई ठिक दिशातिर जैजान नसक्ने बताए । वर्तमान सरकार बरालिएर हिँडेको उनको आरोप छ ।

सभापति थापाले सरकारले गरेका अराजक गतिविधिमाथि खबरदारी गरेर ठिक ठाउँमा ल्याउने काम कांग्रेसको भएको बताए ।