वीरगञ्ज : ६०औं राष्ट्रिय बाल दिवस शनिबार वीरगञ्जसहित देशैभर विविध कार्यक्रम गरी मनाइएको छ । ‘बालबालिकामा लगानी, सुरक्षित भविष्यको थालनी’ भन्ने नारासहित दिवसका अवसरमा वीरगञ्जमा प्रभातफेरी निकाल्नुका साथै सडक नाटक प्रदर्शन गरिएको छ ।

वीरगञ्जको घण्टाघरबाट शुरु भएको प्रभातफेरी माइस्थान चोक, आदर्शनगर, घडिअर्वा हुँदै पुन: घण्टाघर आएर सभामा परिणत भएको थियो । प्रभातफेरीमा सहभागीहरुले ‘बाल संरक्षण, बालबालिकाको अधिकार, कसैले पनि नगरौं दुर्व्यवहार’, ‘सुनिश्चित बाल अधिकार, समृद्ध नेपालको आधार’, ‘सुखी नेपाल, समृद्ध नेपाल, बाल अधिकार सबैको सरोकार’लगायतका नारा अंकित प्लेकार्ड समेत बोकेका थिए । 

प्रभातफेरीपछि आयोजित सभालाई सम्बोधन गर्दै वीरगञ्ज महानगरपालिकाका प्रमुख राजेशमान सिंहले बालबालिकाको शिक्षा, स्वास्थ्यलगायतका अधिकार सुनिश्चित गर्ने कार्यलाई आफूहरुले प्राथमकितामा राखेर योजना बनाउनुका साथै काम गरिरहेको बताए ।

पढ्ने अवसरबाट कुनै पनि बालबालिका बञ्चित हुन नपरोस् भन्ने कुरामा आफूहरु सचेत रहेको उल्लेख गर्दै उनले लक्षित वर्ग केन्द्रित छात्रवृत्ति, दिवा खाजा र विद्यार्थीमैत्री पाठ्यक्रमको व्यवस्था गर्ने नीति अंगिकार गरिएको समेत बताए ।

यस्तै महानगरपालिकाका उपप्रमुख इम्तियाज आलमले बालबालिकाको क्षेत्रमा गरिने लगानीले राष्ट्रकै भविष्य निर्धारण गर्ने हुँदा त्यसमा वीरगञ्ज महानगरपालिकाले निरन्तर लगानी गर्दै आएको बताए । बालबालिकाविरुद्धका हिंसा, दुर्व्यवहार, शोषणलगायत बालविवाहजस्ता कूप्रचलनका घटनाहरु पूर्णरुपमा न्यूनीकरण गर्दै वास्तविक बाल अधिकार प्रवर्द्धन गर्नुपर्ने दायित्व सबैको काँधमा रहेको बताउँदै उनले त्यसका लागि सबैसँग वीरगञ्ज महानगर हातेमालो गर्दै अघि बढ्न तयार रहेको बताए । 

उनले स्वास्थ्य तथा शिक्षामा बालबालिकाको पहुँच वृद्धि गर्दै उनीहरुको शैक्षिक अधिकार सुनिश्चित गर्न माद्यमिक तहसम्मको शिक्षा प्राप्तिमा महानगरले नि:शुल्क व्यवस्था मिलाएको पनि बताए ।

कार्यक्रममा लागुऔषध दुर्व्यसन र बालविवाहका बारेमा सचेतना फैलाउन सडक नाटक समेत बालबालिकाहरुले प्रदर्शन गरेका थिए । वीरगञ्ज महानगरपालिकाको आयोजना तथा टिपिओ नेपाल, आवर संसार र लाइफ नेपालको सहकार्यमा कार्यक्रम सम्पन्न भएको हो । कार्यक्रममा वडा नं. ४ का वडाअध्यक्ष जगत साह कानु, माइती नेपालकी गोमा पौडेल, सामाजिक अभियन्ता अनिषकान्त कुशवाहालगायत बालबालिकाको क्षेत्रमा काम गर्ने विभिन्न संघसस्थाका प्रतिनिधिहरुको सहभागिता रहेको थियो । 

दिवसकै अवसरमा आइतबार महानगरका प्रमुख र उपप्रमुखसँग बालबालिकाको अन्तरसंवाद कार्यक्रम राखिएको महानगरको महिला बालबालिका तथा ज्येष्ठ नागरिक शाखाकी प्रमुख रन्जना पण्डितले जानकारी दिइन् । नेपालले संयुक्त राष्ट्रसंघको बाल अधिकार महासन्धिलाई २०४७ साल भदौ २९ गते अनुमोदन गरेको थियो । सोही दिनको स्मरणमा हरेक वर्ष भदौ २९ गते राष्ट्रिय बाल दिवस मनाइँदै आएको छ ।