सुर्खेत : कर्णाली प्रदेश सरकारले चालु आर्थिक वर्ष २०७९/०८० का पहिलो दुई महिनामा ५३ करोड ७० लाख १० हजार रुपैयाँ खर्च गरेको छ । साउन र भदौ महिनामा यो रकम खर्च भएको जानकारी प्रदेश कोष तथा लेखा नियन्त्रकको कार्यालयका सूचना अधिकारी ललित थापाले दिएका छन् ।
यी दुई महिनामा बजेट खर्च डेढ प्रतिशत (१.७) प्रतिशत मात्र भएको उनको भनाइ छ । प्रदेश सरकारले चालु आर्थिक वर्षका लागि ३१ अर्ब ४१ करोड ४१ हजार रुपैयाँको वार्षिक बजेट विनियोजन गरेको थियो । यस वर्षको प्रारम्भिक दुई महिनामा पुँजीगत बजेटको १२ करोड ८६ लाख २८ हजार ५०७ रुपैयाँ खर्च भएको छ भने चालुतर्फको बजेट ४० करोड ८३ लाख ८१ हजार ५४४ रुपैयाँ खर्च भएको छ ।
यसै अनुसार, चालु बजेट विकास बजेटभन्दा तीन गुणाभन्दा बढी खर्च भएको देखिन्छ । कर्णाली प्रदेशको खातामा हाल ३० अर्ब ८७ करोड ३० लाख ३० हजार ९८४ रुपैयाँको मौज्दात रहेको छ । मुख्यमन्त्री तथा मन्त्रिपरिषद्को कार्यालयले ८ वटा मन्त्रालयका लागि ३८ करोड १२ लाख ९० हजारको वार्षिक बजेटमा दुई महिनामा १ करोड ६५ लाख २७ हजार ३३६ रुपैयाँ खर्च गरेको छ ।
अर्थ मन्त्रालयले चालुतर्फ ८५ लाख ९ हजार र पुँजीगततर्फ १० लाख ८१ हजार खर्च गरेर कुल ९५ लाख ९० हजार खर्च गरेको छ । उद्योग, पर्यटन, वन तथा वातावरण मन्त्रालयले १ अर्ब ९४ करोड ४७ लाखको वार्षिक बजेटबाट ४ करोड २० लाख ५१ हजार खर्च गरेको छ । जलस्रोत तथा ऊर्जा मन्त्रालयले २ अर्ब ८६ करोड ८४ लाखको वार्षिक बजेटमा २ करोड ८५ लाख ५१ हजार खर्च गर्यो । भूमि, व्यवस्था, कृषि तथा सहकारी मन्त्रालयले १ अर्ब ८६ करोड ७२ लाखको वार्षिक बजेटमा ४ करोड ८ लाख २९ हजार खर्च गरेको छ ।
कानुन मन्त्रालयले २८ करोड ६४ लाख ४० हजार बजेटमा ३३ लाख ३९ हजार खर्च ग¥यो, जबकि भौतिक पूर्वाधार तथा सहरी विकास मन्त्रालयले ८ करोड ४५ लाख ६२ हजार खर्च गरेको छ । सूचना अधिकारी थापाका अनुसार, अधिकांश मन्त्रालयको चालु बजेट खर्च बढी भएको छ, र पुँजीगत बजेट कार्यान्वयनमा जान अझै केही समय लाग्नेछ ।
उनले नयाँ योजनाको सम्झौता नभएको र बनाउनु पर्ने योजनाको कार्यविधि निर्माण हुन नसक्दा हालसम्म बजेट खर्च हुन सकेको नसकेको बताए ।
