काठमाडौं : दुई वर्षपछि नेपाल पर्यटन बोर्डले ‘वल्र्ड ट्राभल मार्केट (डब्लूटिएम)’ मा सहभागिता जनाउने भएको छ । आगामी कात्तिक २० देखि २२ गतेसम्म बेलायतको लण्डनमा आयोजना हुने मेलामा सहभागी हुने सुनिश्चित भएको बोर्डले जनाएको छ । अन्तर्राष्ट्रिय बजारीकरण नेपालको पर्यटन प्रवद्र्धनका लागि डब्लूटिएममा सहभागिता जनाउने निर्णय भएको प्रमुख कार्यकारी अधिकृत (सिइओ) दीपकराज जोशीले बताए । ‘बोर्डले डब्लूटिएममा सहभागिता जनाएर अन्तर्राष्ट्रियस्तरमा नेपालको पर्यटन प्रवद्र्धनका लागि ढोका खुलेको छ ।
अन्तर्राष्ट्रिय मेला, सेल्स मिसनलगायत अन्तर्राष्ट्रिय फोरममा बोर्डको प्रभावकारी उपस्थिति रहन्छ’, सिइओ जोशीले भने । अघिल्ला दुई वर्ष बोर्डले डब्लुटिएम, आइटिबीजस्ता अन्तर्राष्ट्रिय मेलामा सहभागिता जनाउन सकेको थिएन । हरेक वर्ष नोभेम्बर (कात्तिक) मा आयोजना हुने यो मेलालाई विश्वको दोस्रो ठूलो पर्यटन मेला मानिन्छ । यस्तै प्रत्येक वर्ष मार्च (फागुन) मा जर्मनीको बर्लिनमा आयोजना हुने ‘इन्टरनेश्नल ट्राभल टुरिजम बर्लिन आइटिबी’ मेलालाई विश्वकै पहिलो पर्यटन मेला मानिन्छ ।
बोर्डले इच्छुक कम्पनीलाई डब्लुटीएममा सहभागिताको लागि आवेदन माग समेत गरेको छ । कम्तीमा ३० कम्पनीलाई ‘डब्लुटिएम’ सहभागी गराइने बोर्डको योजना छ । मेलाबाट व्यावसायिक सम्भावनाका नयाँ आयामबारे सम्पर्क विस्तार गर्ने अवसर मिल्ने दाबी गरिएको छ । बोर्डको करिब दुई अर्ब रुपैयाँ वार्षिक बजेटमध्ये झण्डै ७० प्रतिशत बजेट अन्तर्राष्ट्रिय बजारीकरणमा खर्च गर्दै आएको छ । डब्लुटिएममा नेपालको पहिचान र पर्यटन प्रवद्र्धनका लागि विभिन्न सामग्रीको स्टल राखिने छ ।
