सर्लाही : सर्लाहीको रामनगर गाउँपालिका–२ इनर्वास्थित धान खेतमा एक ४ वर्षीय बालकको शव फेला परेको छ । जिल्लाको दक्षिणपश्चिम क्षेत्रमा पर्ने रामनगर गाउँपालिका–२ इनर्वाका रामध्यान रायका ४ वर्षीय छोरा तेजस्वी यादवको शव धान खेतमा फेला परेको हो ।

बालक सोमबार साँझ साढे ७ बजे घरबाटै हराएका थिए । अबेर रातिसम्म परिवारजनले खोजी गरे पनि ती बालक फेला परेका थिएनन् । बालकको शव मंगलबारमात्र धान खेतमा फेला परेको प्रहरी नायब उपरीक्षक दिपक श्रेष्ठले जानकारी दिए । उनका अनुसार घरबाट ५ सय मिटर टाढा धान खेतमा बालकको शव फेला परेको छ ।

स्थानीयका अनुसार राय दुई वटा विवाह गरेकोमा मृत फेला परेको बालक उनकी जेठी श्रीमतीका एकल सन्तान थिए । राय आफ्नो कान्छी श्रीमतीसँग गाउँमै बस्छन् भने उनकी जेठी श्रीमती गाउँमै रहेको रायको अर्को घरमा बस्ने गर्छिन् ।

बालकको शव पोष्टमार्टमका लागि प्रादेशिक अस्पताल मलंगवा ल्याइएको छ । बालकको सम्भावित मृत्यु नभएको र घटना शंकास्पद देखिएकोमा अनुसन्धान भइरहेको प्रहरीले जनाएको छ ।