उत्तरी छिमेकी मुलुक चीनका शक्तिशाली राष्ट्रपति सी जिङपिङको नेपाल भ्रमण लगभग तय भएको छ । दक्षिणी छिमेकी मुलुक भारत भ्रमण सकेर राष्ट्रपति सी नेपाल आउने बातावरण तय गर्न यसै साता चिनियाँ विदेश मन्त्री वाङ यी र चिनियाँ कम्युनिष्ट पार्टी (सीपीसी)का विदेश विभाग प्रमुख सङ ताओ काठमाडौं आइसकेका छन् । दुवै भ्रमणको उद्देश्य राष्ट्रपति सीको भ्रमण निश्चित गर्नु नै थियो । भदौं २२ गते तीन दिने नेपाल भ्रमणमा आएका विदेशमन्त्री यीले नेपालका प्रमुख पार्टी र तिनका नेताहरुसँग सम्वाद गरेर फर्किएको दुई साता नबित्दै असोज ६ गते सीपीसीका विदेश विभाग प्रमुख ताओ नेपाल भ्रमण आए । प्रयोजन भने राष्ट्रपति सीकै भ्रमण निश्चित गर्नु थियो ।
तर, सीपीसीका विदेश विभाग प्रमुख ताओले गरेको तीन दिने नेपाल भ्रमणले भने नेपालमा थुप्रै आशंका जन्माएको छ । यसको कारण भने ताओले नेपालमा सत्तारुढ दल नेपाल कम्युनिष्ट पार्टी (नेकपा)का उच्च स्तरका कार्यकर्तालाई सी विचारधाराबारे प्रशिक्षित गर्नु नै हो । चीनमा कम्युनिष्ट पार्टीको जनवादी सत्ता हुनु र नेपालमा पनि कम्युनिष्ट पार्टीले दुइ तिहाइ नजिकको मत प्राप्त गरी सरकार चलाउनुको संयोगले पनि आशंका जन्माएको हुनसक्छ । नेकपाका नेताहरुले दिएको प्रष्टिकरणले पनि त्यही तथ्य प्रमाणित गर्ने प्रयास गरेको छ ।
माक्र्सवादलाई मार्गदर्शक सिद्धान्त मान्ने नेपालका कम्युनिष्ट पार्टीले बहुदलीय प्रतिश्पर्धा, मानव अधिकार, प्रेस तथा अभिव्यक्ति स्वतन्त्रता, स्वतन्त्र न्यायपालिका लगायत विधिको शासनलाई अंगीकार अन्तर्वस्तु स्वीकार गरेको छ । तर, सीपीसीले यी तथ्य स्वीकार्दैन । सी विचार धारालाई समेत त्यही डालो र संयोगसँग तुलना गरेर यस पटकको सीपीसीका विदेश विभाग प्रमुखको नेपाल भ्रमणलाई हेरिएको छ । परराष्ट्रका जानकारहरु भने सत्ता र दलबीच भेद खुट्याएर त्यही अनुसारको गतिविधि गरिनुपर्ने तर्क गर्छन् । यस पटकको भ्रमणले सरकार र नेकपाबीच दूरी कायम नभएको भन्ने आशंका जन्मिएको छ ।
तर, नेपालको सन्दर्भमा ताओको भ्रमण नौलो घटना होइन । किनभने, नेपालका शासकहरुले आफू अनुकुल कुनै देशलाई नजिक र कुनैलाई टाढाका रुपमा लिने गरेको छ । राजा, राणा, काँग्रेस, कम्युनिष्ट र राजावादी दलहरुले समेत आफू अनुकुल परराष्ट्र सम्बन्ध कायम गर्दै आएको देखिन्छ । यसले एउटा स्वतन्त्र सार्वभौम देशका लागि अपरिपक्क कुटनीतिक भनिदै आएको छ । त्यसैले यस्ता आशंका र अड्कलबाजी रोक्न सरकारले प्रष्ट परराष्ट्र नीति कायम गर्न ढिलाइ गर्नु हुन्न ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies