काठमाडौं : मकवानपुरमा एक महिलामाथि सामूहिक बलात्कार भएको छ । मकवानपुरको मनहरी गाउँपालिकामा ५० वर्षीया महिलामाथि सामूहिक बलात्कारको घटना भएको हो । 

सामूहिक बलात्कारको आरोपमा श्रीमान नै पक्राउ परेका छन् । आरोप लागेका अन्य दुई जना फरार छन् । 

पीडित महिलाले यही कात्तिक एक गते जिल्ला प्रहरी कार्यालय मकवानपुरमा उजुरी दिएकी थिइन् । सोही उजुरीको आधारमा उनका श्रीमान पक्राउ परेका हुन् ।

३० असोजमा मनहरी गाउँपालिका–५, स्थित आफ्नै घरमा महिलामाथि उनका श्रीमान र अन्य दुई जनाले सामूहिक बलात्कार गरेको उजुरीमा उल्लेख छ । 
पीडित महिलाले ३० असोज रातको समयमा ६० वर्षीय श्रीमान र अन्य दुई जनाले आफूमाथि सामूहिक बलात्कार गरेको उजुरीमा बताएकी छन् ।

मकवानपुरका प्रहरी नायव उपरीक्षक श्यामु अर्यालका अनुसार पीडितकी श्रीमानलाई पक्राउ गरेर मकवानपुर जिल्ला अदालतबाट ५ दिनको म्याद थप गरेको छ । आरोपित दुई जना भने फरार रहेका छन् । डीएसपी अर्यालका अनुसार पीडित महिलाले दुई किशोरको अन्दाजी उमेर १९ र २० वर्ष हुनसक्ने बताएकी छन् । 

महिलाले श्रीमानसहित दुई जना किशोरले बलात्कार गरेको बताएको प्रहरीले जनाएको छ । किशोरहरुलाई आफू नचिन्ने पीडितले बताएकी छन् । दोषी पत्ता लगाउन प्रहरीले घटनाको सुक्ष्म अनुसन्धान गरिरहेको छ । 

पीडित महिलालाई हेटौंडास्थित महिला सेफ हाउसमा राखिएको छ । उनको स्वास्थ्य अवस्था ठीक रहेको प्रहरीले जनाएको छ ।