म्याग्दी : बेनी अनलाइनका प्रधान सम्पादक हरिकृष्ण गौतम म्याग्दी प्रवासी नेपाली संघ (मोना) फ्रान्सबाट सम्मानित भएका छन् । बिहीबार मोना अन्तर्राष्ट्रियको सचिवालयमा आयोजित समारोहमा मोना फ्रान्सका कोषाध्यक्ष दिनेश कार्की, संस्थापक सदस्य नवीन कार्कीले रु २० हजार, सम्मान पत्र र दोसल्ला ओढाएर सम्मान गरेका हुन् ।

मोना फ्रान्सका अध्यक्ष ओम गौचन, महासचिव महेन्द्र बोहोराद्धारा हस्ताक्षर गरिएको सम्मान पत्रमा स्थापनाकालदेखि मोना फ्रान्सका समाचार तथा पत्रकारितामार्फत मानवीय तथा सामाजिक क्षेत्रमा योगदानको कदर गदै सम्मान गरिएको उल्लेख छ । सम्मान कार्यक्रममा अधिवक्ता दीपक कार्की, मोना सचिवालयकी प्रमुख स्मृति सुवेदी, युवा व्यवसायी जीवन कार्की लगायतको उपस्थिति रहेको थियो । 

सम्मान कार्यक्रममा बोल्दै मोना फ्रान्सका कोषाध्यक्ष दिनेश कार्कीले जन्मभूमिका विभिन्न क्षेत्रमा संस्थाले सक्ने सहयोग गर्ने बताए । डेढ दशकदेखि म्याग्दी जिल्लामा सक्रिय गौतम बेनीबाट प्रकाशन हुने बेनी साप्ताहिकका प्रकाशक, नागरिक दैनिक, पब्लिक फोर के टेलिभिजन, ढोरपाटन दैनिकलगायतका सञ्चारमाध्यममा आबद्ध छन् ।