सुर्खेत : जाजरकोटको शिवालय गाउँपालिकामा पहिलो पटक युवाहरुको साक्षात्कार कार्यक्रमको आयोजना गरिने भएको छ । शिवालय युवा जागरण नेपालद्वारा आगामी कात्तिक २१ गते उक्त कार्यक्रमको आयोजना गर्न लागिएको हो ।
शिवालय गाउँपालिका वडा नम्बर १ देखि ९ सम्मका युवाहरुको समन्वयमा ‘समृद्धि रुपान्तरणका लागि, जुटौं युवा सुधारौं समाज’ भन्ने मूल नाराका साथ पालिकामा पहिलो पटक उक्त कार्यक्रमको आयोजना गरिएको शिवालय युवा जागरण नेपालका संयोजक करसिंह कठायतले जानकारी दिए ।
युवाहरुको सक्रियता र सहभागिता सुनिश्चित गर्नका लागि कार्यक्रम गर्न लागिएको संयोजक कठायतको भनाइ छ । उनले २१ गते गर्न लागिएको कार्यक्रमले भविष्यमा सामाजिक विकास र परिवर्तनमा योगदान गर्न सक्ने विश्वास लिएको बताए ।
युवाहरुको विचार र चासोहरुलाई जनप्रतिनिधिसम्म पुर्याउने अवसर समेत उक्त कार्यक्रमले प्रदान गने बताइएको छ । संयोजक कठायतका अनुसार कार्यक्रम गाउँपालिकाको सभाहलमा गर्न लागिएको छ ।
