काठमाडौं : विगत करिब दुई दशकदेखि नेपाली गीत–संगीतको क्षेत्रमा सक्रिय लोकप्रिय गायक नारायण थापाको तिहार गीत ‘तिहार राम्रो’ सार्वजनिक भएको छ । बुधबार काठमाडौंमा एक विशेष समारोहबीच ‘तिहार राम्रो’ सार्वजनिक गरिएको हो ।
गीतमा विगतदेखि वर्तमानसम्मको तिहारलाई झल्काइएको छ । ‘तिहार राम्रो’मा थापासँगै सब्बु केसी र रवी सुवेदीको स्वर रहेको छ भने सुरेन उप्रेतीको रचना तथा विकास चौधरीको संगीत रहेको छ ।
गीतमा सञ्जय हमालको एरेन्ज, गोविन्द सोनीको मिक्सिङ मास्टरिङ, ललितसिंह साउदको सम्पादन, विमलकुमार ढकालको छायाँकन तथा निर्देशन रहेको छ । गायक थापा र गायिका केसीकै अभिनय रहेको गीतलाई ए लेभल म्युजिकले बजारमा ल्याएको हो ।
हाल विभिन्न मेला–महोत्सव तथा सांस्कृतिक कार्यक्रमहरुमा व्यस्त गायक थापाका गत महिना पनि ‘सोह्रै श्रृंगार’, ‘आज मृत्युले मलाई’, ‘रातभरि’लगायत गीत सार्वजनिक भएका थिए । थापाको ‘अजम्बरी’ (२०७२), ‘परिवेश’ (२०७७) र ‘आकर्षण’ (२०७९) गरी ५/५ वटा गीत समावेश तीन वटा एल्बम आइसकेका छन् भने चौथो एल्बम ‘आभूषण’ सन्मुखमा छ ।
