अर्घाखाँची : अर्घाखाँचीको छत्रदेव गाउँपालिकामा भइरहेका पूर्वाधार तथा अन्य विकास निर्माणप्रति काठमाडौंमा बस्ने अर्घाखाँचीबासिले चासो देखाएका छन् ।
छत्रदेव गाउँपालिका अर्घाखाँचीले आयोजना गरेको छलफल कार्यक्रममा गाउँपालिकामा आर्थिक वर्षमा भइरहेका विकास निर्माण, सुशासन तथा सेवा प्रवाहसम्बन्धी सरोकारवालासगँको छलफलमा उनीहरुले विकास निर्माणप्रति चासो व्यक्त गरेका हुन् ।
छलफल कार्यक्रममा राष्ट्रिय योजना आयोगका सदस्य डाक्टर जयबहादुर टन्डनले योजना छनोट गर्दा छरिएका योजनाहरू छनोट गर्न नहुने बताए । टन्डनले ठूला र देखिने योजनाहरू छनोट गर्दै विकास निर्माणका कामहरू अगाडि बढाउनुपर्नेमा जोड दिए ।
त्यस्तै बाटोघाटो, पुल निर्माणमा गाउँपालिकाले सबै सरोकारवालासँग यसैगरी आवश्यक समन्वय गर्नुपर्ने उनको भनाइ थियो । राष्ट्रिय योजना आयोगका अर्का सदस्य डाक्टर प्रकाश श्रेष्ठले गाउँपालिकाभित्र ‘सडक निर्माण गर्दा कालोपत्रे गर्दा वा अन्य विकासका कामहरु गुणस्तरीय भएको नभएको स्थानीय जनताले अनुगमन गर्नुपर्ने बताए ।
उनले छत्रदेव गाउँपालिकाले पहाडि जिल्लामा धेरै राम्रो काम गरेको रहेछ भन्दै अब पालिकामा हुने विकास निर्माणका लागि आफुहरु पूर्ण रुपमा सहयोग गर्ने प्रतिबद्धता व्यक्त गरे । श्रेष्ठले गाउँपालिकालाई सफा सुन्दर बनाउनका लागि फोहोर व्यवस्थापन समेत चुनौतीका रुपमा देखा परेको भन्दै यसको दीर्घकालीन समाधान खोज्न जनप्रतिनिधिलाई आग्रह गरे ।
कार्यक्रममा स्वास्थ्य बीमा बोर्डका सदस्य डाक्टर मुक्ति श्रेष्ठले जनप्रतिनिधिहरूले चुनावी प्रतिबद्धता अनुसार जनभावना बुझेर विकास निर्माणका काम तथा सेवा प्रवाह गर्नुपर्ने बताए ।
‘विकास बजेट आवश्यकता अनुसार प्रवाह हुनुपर्छ’ डाक्टर श्रेष्ठले भने, ‘सडक तथा पुलहरू चाँडो निर्माण हुनुपर्छ, यस्ता पूर्वाधार विकासमा ढिलाइ हुने गरेको छ ।’ छत्रदेवमा कुनै समस्या भए आफुहरु सहयोग गर्न तयार रहेको उनले बताए ।
कार्यक्रममा वीर अस्पतालका सहायक डिन डाक्टर राजेन्द्र श्रेष्ठले अधिकांश गाउँपालिकाबासिले पालिकाले दिने सेवा प्रवाहका बारेमा चासो राख्नु निकै सकारात्मक भएको बताए ।
श्रेष्ठले गत वर्षको लिजा कार्य सम्पादन मूल्यांकनमा गाउँपालिका स्थानीय तहमा छनोट हुनु र पालिकाबाट प्रवाह हुने सेवा र विकास यसअघिका जनप्रतिनिधिले अगाडि सारेका पूर्वाधार संरचनाहरू वर्तमान जनप्रतिनिधिहरूले निरन्तरता नदिएकोमा धन्यवाद ब्यक्त गरेका थिए ।
कार्यक्रममा गाउँपालिका राष्ट्रिय महासंघका सल्लाहकार तथा छत्रदेव गाउँपालिकाका पूर्व अध्यक्ष लेखनाथ पोख्रेलले गाउँपालिमा व्यवस्थित ढल निकास हुन नसकेको, कृषि र पर्यटनमा जनप्रतिनिधिले ध्यान दिएपनि बजेटको अभाव भएको रोजगार सिर्जनातर्फ गाउँपालिकाले ध्यान दिएपनि साधन श्रोतको अभाव पालिकाको आन्तरिक श्रोत नभएकोले सोचे जति विकास हुन नसकेको, लक्षित वर्गको बजेट अन्यत्र खर्च गर्नुपर्ने बाध्यता हुने गरेको तर गाउँपालिकामा आफ्नो कार्यकालमा धेरै विकासमा कामहरु सम्पन्न भएको र बाँकी रहेका कामहरु वर्तमान गाउँपालिकाका अध्यक्ष चन्द्रमान श्रेष्ठ लगायतका जनप्रतिनिधिले दु्रत गतिमा अगाडि बढाएकोले विकास निर्माणका कामहरुमा सबै छत्रदेवबासीले सहयोग गर्नुपर्ने बताए ।
कार्यक्रममा छत्रदेव गाउँपालिकाका अध्यक्ष चन्द्रमान श्रेष्ठले आफुहरु पालिकामा निर्वाचित भएपछि पूर्वाधार, शिक्षा, पशु सेवा एवम् कृषि, वन तथा वातावरण, आर्थिक विकासलगायत शीर्षकमा गाउँपालिकाले उत्कृष्ट काम गर्न सफल भएको बताए ।
अध्यक्ष श्रेष्ठले गाउँपालिकाका ८ वटै वडालाई जोड्ने गरी अगाडि सारिएको रिङरोडको काम सबैको सहयोग भएमा र बजेट लैजान सकेमा तीव्र गतिमा अगाडि बढने जानकारी दिए ।
उनले गाउँपालिकामा विकास गर्न सबै ले चासो दिदा आफुहरु काम गर्न उत्साहित भएको बताउँदै राजस्व तथा स्रोत परिचालतर्फ गाउँपालिकामा न्यून आयश्रोत रहेको बताए । अध्यक्ष श्रेष्ठले चालु आवमा आन्तरिक राजस्वतर्फ सोचे अनुसार राजस्व उठन नसक्ने बताए ।
संघीय सरकारबाट राजस्व बाँडफाँडको पैसा र प्रदेश सरकारबाट राजस्व बाँडफाँडको रकम प्राप्त नहुँदा विकास निर्माणका कामहरु प्रभावित भएको उनको भनाइ छ । गाउँपालिकाले चालु आवको विनियोजित बजेटमध्ये हालसम्म चालु खर्चतर्फ २५ प्रतिशत र पुँजीगततर्फ २६ प्रतिशतमात्रै वित्तीय प्रगति हासिल गरेको गाउँपालिकाका प्रमुख प्रशासकीय अधिकृत राजन पाण्डेले जानकारी दिए ।
कार्यक्रममा सरोकारवालाहरूले राखेको जिज्ञासा तथा गुनासोको जवाफ दिँदै प्रमुख प्रशासकीय अधिकृत पाण्डेले पालिकाबासीको चाहनाअनुसार काम गरिरहेको बताए । पाण्डेले पालिकाभित्र जनताको काम काम छिटो र जनताले दुःख नपाउने गरी मुस्कानसहितको सेवा दिने गरेको बताए ।
कार्यक्रममा नेपाल सरकारका सहसचिव हुमकला पाण्डे, पूर्व सहसचिव डाक्टर लोकनाथ पौडेल, पूर्व सहसचिव ईश्वरीप्रसाद पाण्डे, डाक्टर चिरञ्जीवी भट्टराई, अर्थमन्त्रालयका उपसचिव सुरेन्द्र पाण्डे, गोकर्णराज बन्जाडे, तुल्सीराम न्यौपाने, तारा प्रसाद फुल्लेल, सचिन पाण्डे, सुशील खनाल, नारायण भट्टराई, गणपति पाण्डे, सोमकुमारी राना, युवराज श्रेष्ठ लगायतका सरोकारवालाहरुले आफ्नो भनाइ राखेका गाउँपालिकाका प्रमुख प्रशासकीय अधिकृत पाण्डेले जानकारी दिए ।
