मलेसिया : वैदेशिक रोजगारीको लागि मलेसिया आएका ओखलढुंगा जिल्ला सिद्धीचरण नगरपालिका बर्नालु ४ का राकेश राईको परिवार यतिखेर शोक, पीडा र अन्योलको छटपटीमा परिरहेको छ । राईमाथी घटेको घटनाले यो परिवार शोकमय अवस्थामा छ ।
राकेश र उनकी श्रीमती मलेसियाको जोहोर राज्यको तामान सेम्पाक भन्ने ठाउँमा एउटै कम्पनीमा काम गर्थे । श्रीमती उनको आफ्नो करार अवधि सकिएपछि केहि समय पहिले स्वदेश फर्किइन् । मलेसियामा रहेका राकेश भने कम्पनी छोडेर अवैधानिक बनेर नजिकैको एउटा नेपाली रेस्टुरेन्टमा काम गर्न थाले । केही समय काम गरेपछी उनले आफैले मलेसिया मै रेस्टुरेन्ट खोल्ने निर्णय गरे । रेस्टुरेन्ट खोल्न भनेर उनले नेपालमा परिवारसँग ऋण खोजिदिन आग्रह गरे । परिवारले पनि ऋण गरेर केही पैसा पठाइदिए । त्यहि पैसाले राकेशले एक स्थानीयबासीको सहयोगमा मलेसियाको जोहोरमै रेस्टुरेन्ट सुचारु गरे ।
केही समय नबित्दै रेस्टुरेन्ट भनेजस्तो नचलेकोले चिन्तित राकेश एक्लै हिड्ने, एक्लै बस्ने गर्न थाले । उनका नजिकका साथीहरूका अनुसार राकेश पटकपटक आत्माहत्याको प्रयास गरिरहेका हुन्थे । एक प्रकारको मानसिक चिन्ताले ग्रस्त उनी झुण्डिएर मर्ने भन्दै तार बोकेर हिडिरहेको बेला केही साथीहरूले सम्झाइ बुझाइ गरेर राखेका थिए तर केही दिन नबित्दै उनी बेपत्ता भए ।
नजिकै आसपासका साथीहरूले सोधखोज गर्दासमेत राकेशको केही अत्तोपत्तो नलागेपछि कतै गएको होला भनेर साथीहरूले पनि चासो देखाउन छोडे ।
एक दिन उनीहरू बस्ने होस्टलदेखि केही पर झाडिमा म्यान्मारका केहि कामदारहरूले साग टिप्न जानेक्रममा केही दुर्गन्ध आएको भन्दै हेर्दा राकेश झुण्डिएर आत्महत्या गरेको र उनको अस्थिपञ्जर मात्रै बाकी रहेको अबस्थामा फेला पारेका थिए ।
केही साथीहरू र नजिकै रहेका आफन्तहरूले समेत त्यो शव राकेशको नै रहेको एकिन गरिसकेपछी प्रहरीले शव उठाएर अनुसन्धान थालेको छ । नेपालमा रहेका राकेशको परिवार र राई गाउँमा नै राकेशको मृत्युको खबरले सन्नाटा छाएको छ ।
राकेशको घरमा एउटी नावालिका छोरी छिन् जो सबै कुरा बुझ्ने भैसकेकी छैनन् । बुढ्यौलीले छोइ सकेका राकेशका बाबुआमा छन् । कहिले धामी झाक्रीलाई देखाउने, कहिले छोरोको संझना बिर्सने नाममा मदिरा पिउने जस्ता कार्यमै वृद्ध बा आमाको दैनिकी गुज्रिएको छ ।
राकेशको परिवारले मलेसियामा रहेको नेपाली दूतावाससँग उनको अवस्थाबारे सम्पर्क गरिरहेका छन् । उनीहरूका अनुसार मलेसियन प्रहरीले नेपालमा भएका परिवारको डिएनए परीक्षण गराएर प्रमाणित भए मात्रै राकेश हुन् भन्ने एकिन गर्न सकिने बताएको छ ।
शोकमग्न सिंगो गाउँ नै अहिले अन्योलमा छ । राकेश जिवित नभए परम्परा अनुसार दाहसंस्कार गर्नपाए हुन्थो भन्ने ठूलो अपेक्षा लिएर बसेका छन् - उनका परिवार । मलेसियन प्रहरीले माग गरे अनुसार डिएनए परीक्षण गराउने खर्च जुटाउन सक्ने अवस्थामा छैन राकेशको परिवार । उनीहरू केवल राकेशको अस्थिपञ्जर या अस्तुको प्रतीक्षामा छन् ।
