दोहा कतार : संघीय लिम्बुवान सामाजिक मञ्च (सलिसाम) कतारले नेपालीहरूको महान् चाडपर्वहरू एकमुस्ट मनाएको छ । महान चाडपर्वहरू विजया दशमी, दीपावली (तिहार), बलिहाङ तङ्नाम, नेपाल संवत् ११४५, म्ह पूजा, हुर्रा, छठ, जितिया लगायत राष्ट्रिय चाडपर्वहरूको अवसरमा शुभकामना आदान–प्रदान गर्दै मनाएको छ ।

एसियन टाउनस्थित लालीगुराँस रेस्टुरेन्टको सभा हलमा गत शुक्रबार सल साम कतारका अध्यक्ष डम्बर लिबाङ ‘मिसेक’को सभाध्यक्षता र संघीय लोकतान्त्रिक सामाजिक मञ्च कतारका संयोजक कुमारसीँ योङहाङको प्रमुख आतिथ्यतामा विविध सांस्कृतिक प्रस्तुतिसहित मनाएको हो । आफ्नो शुभकामना मन्तव्य राख्ने क्रममा प्रमुख अतिथि योङहाङले नेपालमा धेरै मत ल्याउनेले सरकार सञ्चालन गर्ने र आफ्नो अनुकूल बमोजिम नीति निर्माण गर्ने हुँदा थोरै संख्याले धेरै संख्यालाई शासन गर्ने राजनीतिक अभ्यासलाई परिमार्जित गर्नुपर्ने बताए । उनले शासन परिवर्तन भएपनि व्यवस्था उस्तै रहेको बताए ।

चर्चित गायिका जुनु प्रसाईँसहित थुप्रै कलाकारहरूको सांस्कृतिक प्रस्तुति दिएको कार्यक्रममा देउसी, भैलो, लालिङकेत–नाम्लिङकेत र थारु एवम् विभिन्न जातजातिका मौलिक झाँकीसहितको प्रस्तुति रहेको थियो । कार्यक्रममा कतारमा स्थापित विभिन्न वैचारिक, सामाजिक तथा सामुदायिक संघसंस्थाका प्रमुख तथा प्रतिनिधिहरूको उपस्थितिसहित शुभकामना मन्तव्य रहेको थियो । 

वक्ताहरूले कार्यक्रमको प्रशंसा गर्दै देशभित्र कहिलेकाहीँ घट्ने साम्प्रदायिक समस्याहरूबीच यस्ता कार्यक्रमले आपसी सद्भाव एवम् सह–अस्तित्वको विकास कसरी गर्ने भन्नेबारे विशेष भूमिका खेल्न सक्ने विश्वास व्यक्त गरेका थिए । 

मञ्चका उपाध्यक्ष किरण विक्रम यवाको स्वागत मन्तव्य राखेको कार्यक्रमलाई महासचिव छत्र कुरुम्भङले सहजीकरण गरेका थिए । कार्यक्रमको समापन गर्दै सभाध्यक्ष लिबाङले  देशमा ठूला अनि पुराना राजनीतिक दलका रूपमा चिरपरिचित दलहरूले नेपाली जनतालाई विभिन्न मुक्ति, समानताको नाममा तथा कहिले सह–अस्तित्व र समाजवादको नाममा भ्रम सृजना गर्ने गरेको आरोप लगाए । उनले नेपालमा कसैले कसैमाथि एकल शासन लाद्न सम्भव नहुने भएकोले देशमा शान्ति, विकास र समृद्धिका लागि सबैभन्दा पहिला सह–अस्तित्वको ढोका खोल्नुपर्ने आवश्यकता औँल्याए । 

लिबाङले नेपालभित्रको विविधतालाई बचाई राख्न सकियो भने मात्र राष्ट्रियता बलियो हुने भएकोले आपसी धार्मिक सहिष्णुता, सामाजिक भाइचाराको विकास गर्दै नेपालको राष्ट्रियतालाई बलियो बनाउन सबै एकजुट हुनुपर्ने बताए । कार्यक्रममा सांगीतिक प्रस्तुति दिने कलाकारहरूलाई सम्मान समेत गरिएको थियो ।