२०७२ को संविधान जारी भएको चार वर्ष पार गरिसकेको छ । दश वर्षे ‘जनयुद्ध’, दोस्रो जनआन्दोलन २०६२/०६३, मधेश विद्रोह र आदिवासी जनजाति आन्दोलन लगायत जनसंघर्षको जगमा बनेको संविधानको परिकल्पनाअनुसार, मुलुकमा तीन तहको सरकारको संरचना बनेको छ । सात सय ५३ स्थानीय सरकार बनेको तीन वर्ष नै पुग्न लागेको छ भने प्रदेश सरकार बनेको पनि दुई वर्ष नाघेको छ । यो अवधिमा बागमती, गण्डकी, कर्णाली र सुदूरपश्चिम प्रदेशले नामाकरण र प्रदेशको राजधानी टुंग्याइसकेका छन् । तर, प्रदेश–१, २ र ५ ले भने अझै पनि प्रदेशको नामाकरण र राजधानी टुंगिन सकेको छैन । प्रदेश–१ ले राजधानी टुंगो लगाएपनि नामाकरण गर्न सकेको छैन । प्रदेश–५ मा राजधानीको विषय पेचिलो बनेको छ । बागमती प्रदेशको नामाकरणमा सहमति जुटेपनि राजधानी मतदानबाट टुंगिएको छ ।
यी तीन प्रदेश मध्ये प्रदेश–२ को विषय भने बढी पेचिलो देखिएको छ । मंगलबार सम्पन्न मतदानबाट प्रदेशको नामाकरण र राजधानी अस्वीकृत भए पछि भने जटिलता थप बढेर गएको छ । किनभने, मतदान प्रक्रिया अगाडि बढेपछि जुटेको सहमति फेरि तोडिएको छ । प्रदेश–२ मा समाजवादी पार्टी नेपाल र राष्ट्रिय जनता पार्टीले ‘मधेश’ प्रदेश, नेपाल कम्युनिष्ट पार्टी (नेकपा) ले ‘जानकी’, नेपाली काँग्रेसले ‘मिथिला–भोजपुरा’ र काँग्रेसकै केही सांसदहरुले ‘मध्य मधेश’ प्रदेशको प्रस्ताव दर्ता गराएका थिए । तर, मंगलबारको निर्वाचनमा कुनै पनि प्रस्ताव पारित हुन सकेन । यो प्रदेशमा कुनै पनि दलसँग नामाकरण र राजधानीको नामाकरण गर्न प्रष्ट बहुमत छैन । १०७ सांसद रहेको प्रदेश–२ मा नामाकरण र राजधानी मतदानबाट टुंगिन ७२ सांसदको आवश्यकता पर्छ । तर, समाजवादी–राजपासँग ५६, नेकपासँग ३२ र काँग्रेससँग १९ सांसद मात्रै छन् । त्यसैले कुनै पनि दलको प्रस्तावको पक्षमा ७२ मत पुग्न सकेन ।
तर, नामाकरणको प्रस्तावमा भएको मतदानकै कारण राजधानीबारे जुटेको सहमति पनि फेरि तोडिएको छ । यसअघि सवै दलले ढल्केबर पेरिफेरिमा प्रदेशको राजधानी राख्ने सहमति गरेका थिए । तर, जब नामाकरणमा मतदान भयो, ढल्केबर राजधानी रहने सहमतिको पक्षमा समेत आवश्यक मत पुग्न सकेन । यसले प्रदेश–२ लाई अझै अनिश्चिततातिर धकेलेको छ । त्यसैले यसको निर्विकल्प सहमति नै हो, अर्थोकबाट समस्या हल हुने देखिदैन ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies