काठमाडौं : ८ वर्षको विवादपछि हलिउड कलाकारहरू एन्जेलिना जोली र उनका श्रीमान् ब्रेड पिट सम्बन्धबिच्छेद गर्न सहमत भएका छन् । उनीहरूबीच साझा सम्पत्ति, सन्तानमाथिको अधिकार र शारीरिक उत्पीडनको मुद्दामा लामो समययता कानुनी लडाइँ चलिरहेको थियो ।
दुवै जनाले सम्बन्धबिच्छेदको सहमतिमा हस्ताक्षर गरेका छन् । यद्यपि, सम्झौताको सर्तहरू सार्वजनिक गरिएको छैन । पिटका वकिलले यसबारे केही प्रतिक्रिया दिन नमाने पनि जोलीका वकिलले मिडियामा बोलेका छन् । उनका अनुसार, फ्रान्सको अंगुर बगानलाई लिएर जारी कानुनी लडाइँबारे मुद्दा टुङ्गिने बाँकी छ ।
जोली र पिटले १० वर्षअघि १४ अगस्ट २०१४ मा बिहे गरेका थिए । पिटको दोस्रो अनि जोलीको तेस्रो विवाह थियो । जोली र पिटका ६ बच्चा छन् ।
विवाद सुरु भएपछि उनीहरूबीच बच्चा कोसित राख्ने भन्ने विषयमा सन् २०२१ मा अदालतले फैसला सुनाएको थियो । विवाह गरेको दुई वर्षपछि नै एन्जेलिनाले ९ सेप्टेम्बर २०१६ मा सम्बन्ध बिच्छेदका लागि अदालतमा निवेदन दिएकी थिइन् । त्यो बेला उनले विचार नमिल्दा सँगै बस्न नसक्ने कारण देखाएकी थिइन् ।
तर पछि विभिन्न अदालतमा सुनुवाइका क्रममा पिटले जुली र उनका सन्तानलाई कुटपिट गरेको विषयसमेत सार्वजनिक भएको थियो । सन् २०१६ मा एक निजी विमानमार्फत यात्रा गर्दा आफू र दुई बच्चालाई पिटले कुटपिट गरेको आरोप एन्जेलिनाले लगाएकी थिइन् ।
घटनाबारे प्रहरीले अनुसन्धानसमेत गरेको थियो । यद्यपि, पिटमाथि कुनै मुद्दा चलाइएन । उनले आरोपहरू सरासर झुटो भएको बताएका थिए ।
