काठमाडौं : पोखराको सूर्यदर्शन सहकारी ठगी प्रकरणमा जिल्ला अदालत कास्कीमा थुनछेक बहस जारी छ । जिल्ला न्यायाधीश नितिज राईको इजलासमा मंगलबारदेखि थुनछेक बहस सुरु भएको हो ।
मंगलबार सरकारको पक्षबाट दुई जना वकिलले सात जना प्रतिवादीहरूमाथि बहस गरेका थिए । सरकारी वकिलको कार्यालयको तर्फबाट सहायक न्यायाधिवक्ता सुजता पौडेल र सहायक जिल्ला न्यायाधिवक्ता शान्तिदेवी शर्माले थुनछेक बहस गरेका थिए । बहसमा उनीहरूले प्रतिवादीहरू प्रारम्भिक चरणमै दोषी देखिएकाले पुर्पक्षका लागि थुनामा पठाउनुपर्ने जिकिर गरेका थिए ।
यस्तै, बुधबार सरकारी वकिल कार्यालयका न्यायाधिवक्ताहरूको बहस सकिएको छ । सरकारी वकिलका तर्फबाट न्यायाधिवक्ता कमला काफ्ले, सहायक न्यायाधिवक्ता शान्तिदेवी शर्मा, विपिनराज तिवारी, उपन्यायाधिवक्ता प्रकाश गौतम र नायब महान्यायाधिवक्ता सञ्जीवराज रेग्मीले बहस गरेका थिए । सरकारी वकिल कार्यालयका न्यायाधिवक्ताहरूको बहस सकिएसँगै बिहीबारदेखि जाहेरीवालाको तर्फबाट बहस हुने छ ।
जाहेरीवालाको तर्फबाट १२ जनाले बहस गर्ने अदालत प्रशासनले जनाएको छ । जाहेरवालाको बहसपछि भने प्रतिवादीको तर्फबाट बहस हुनेछ ।
प्रतिवादीहरूको तर्फबाट बहस गर्ने वकिलहरूको संख्या धेरै छ । त्यसमध्ये लामिछानेको पक्षबाट प्रतिरक्षा बहस गर्नेको संख्या सबैभन्दा बढी १८ जना छन् ।
यस्तै नेपाल प्रहरीका पूर्व डिआइजी छविलाल जोशीको तर्फबाट भने दुई जना वकिलले प्रतिरक्षा बहस गर्ने छन् । त्यसैगरी लिला पछाईंका तर्फबाट चार जना वकिलहरूले प्रतिरक्षा बहस गर्ने छन् । यस्तै रामबहादुर खनालको तर्फबाट पनि चार जनाले वकालतनामा दिएका छन् ।
पूरक जाहेरीपछि गत ५ र ७ पुसमा ६३ जनाविरुद्ध कास्की जिल्ला अदालतमा मुद्दा दायर भएको थियो । त्यही मुद्दामा अहिले रास्वपा सभापति लामिछाने, पूर्व डिआइजीसमेत रहेका गोर्खा मिडियाका पूर्व उपाध्यक्ष छविलाल जोशी, जीवी राईसँग मिलेर रकम हिनामिना गरेको आरोपमा पक्राउ परेकी लिला पछाई, साझेदार नेचर हब्र्सका सञ्चालक रामबहादुर खनाल, संस्थापक उपाध्यक्ष मीना गुरुङ, पूर्व कोषाध्यक्ष आरती गुरुङ, सञ्चालक कृष्णबहादुर गुरुङलाई अहिले अदालत उपस्थित गराएर बहस भएको हो ।
