काठमाडौं : लेखक तथा निर्देशक विश्वमणि घिमिरे र एलबी कटुवालको निर्देशनमा बन्ने जनचेतनामूलक टेलिशृंखला ‘गाउँ फर्क’को लिरिकल गीत सार्वजनिक भएको छ । गीत अंग्रेजी नयाँ वर्ष २०२५ तथा टोपी दिवसको अवसर पारेर सार्वजनिक गरिएको हो ।

गीतको भिडियोमा नेपाल चलचित्र कलाकार संघका अध्यक्ष मोहन निरौला, कलाकार सुवास गजुरेल, उत्तम के. सी., सुभेक्षा थापालगायतलाई देख्न सकिन्छ ।

गीतमा कलाकारहरू मुकुन्द मैनाली, मनमाया कटुवाल, लक्ष्मीनाथ तिम्सिना, अशोक सिवाकोटी, अस्मिता बस्नेत, आशा भुसाल, इच्छा सिंह, प्रतीक्षा काफ्ले, मुभ थापा र चन्दा भट्टराईलाई देखाइएको छ ।

गाउँघरको कथा र विदेशिएका नेपालीहरूको व्यथालाई गीतमा समेटिएको छ । शंकर अधिकारी ‘घायल’को शब्द, विकास चौधरीको संगीत र नारायण थापाको स्वर रहेको गीत ‘गाउँ फर्क’ युट्युब च्यानलबाट सार्वजनिक गरिएको हो । 

निर्देशक घिमिरेका अनुसार यो टेलिशृंखला धनकुटाको महालक्ष्मी नगरपालिका वडा– ४, चानुवामा छायांकन गरिने र नेपाल टेलिभिजनबाट चाँडै प्रसारणमा आउने छ । उनले आमनागरिकले टिकटक, फेसबुक, युट्युबलगायतका सामाजिक संजालमा ‘गाउँ फर्क’को गीतमा अडियो लिई भिडियो बनाउँदा कुनै कपिराइट नलाग्ने बताए ।