काठमाडौं : नेकपा एमालेमा रहँदा पार्टी अध्यक्ष केपी शर्मा ओलीसँग निरन्तर आलोचनात्मक रूपमा प्रस्तुत हुँदै आएका नेता हुन्– भीम रावल । पार्टीबाट निकालिएपछि उनले तिनै अध्यक्ष ओलीमाथि प्रश्न गर्नु स्वाभाविक थियो । तर, एमालेबाट निष्कासित भएपछि नयाँ अभियानको घोषणा गर्न आयोजित पत्रकार सम्मेलनमा रावल बुधबार ओलीमाथि अनेक आरोपसहितका प्रश्न लिएर प्रस्तुत भए ।
१० पुसको एमाले सचिवालय बैठकले रावललाई अनुशासनको कारबाही गर्दै संगठित सदस्यबाट समेत निकालिदिएको थियो । बुधबार पत्रकार सम्मेलन गरेर रावलले आफ्ना भनाइ राखेका हुन् । त्यसक्रममा उनले एमाले अध्यक्ष ओलीमाथि आरोपको वर्षा नै लगाए ।
पत्रकार सम्मेलनमा रावलले एमालेमा रहँदा अध्यक्ष ओलीसँगको मतभेद कम गर्न पटकपटक प्रयास भए पनि बेवास्ता गरिएको गुनासो गरे । आफू पार्टीमा मिलेर जाने पक्षमा रहे पनि ओलीबाट त्यसअनुसारको व्यवहार नभएको भन्दै गुनासो गरे ।
एमाले पार्टीलाई कम्युनिस्ट आचारणविपरीत मात्र नभई संविधानविपरीतसमेत संचालन गरेको आरोप ओलीमाथि रावलले लगाएका छन् ।
‘गम्भीर विषयमा केन्द्रित हुनुको साटो तपाईंले आफू र पार्टी पंक्तिलाई सत्ताको खेलमा लिप्त बनाउनेतर्फ किन निर्देशित गर्नुभयो ?’, ओलीलाई रावलको प्रश्न छ ।
‘कम्युनिस्ट पार्टीले मान्दै आएका मान्यताका विरुद्ध मात्र होइन, नेपालको संविधानको मार्गनिर्देशन र मर्मविपरीत काम–कुरा किन गर्नुभयो ?’, रावलको अर्को प्रश्न छ ।
अध्यक्ष ओलीमाथि रावलका ७४ वटा प्रश्न छन्, जसको जबाफ पत्रकार सम्मेलनमार्फत रावलले ओलीसँग मागेका छन् । अन्यथा, ओलीको मिसन ८४ सफल नभई पतन हुने रावलको चेतावनी छ ।
आफूलाई देशभक्त, लोकतान्त्रिक, न्यायप्रेमी जनता र नेकपा एमाले पंक्तिको पक्षधर भनेका रावलले अगाडि भनेका छन्, ‘देश र जनताको हितका लागि उठाइएका विषय एवं प्रश्नहरूको तपाईं केपी ओलीले जबाफ दिनुपर्छ र स्पष्ट गर्नुपर्छ । अन्यथा, तपाईंले भन्दै आउनुभएको मिशन ८४ मिसन पतन साबित हुने छ ।’
रावलले ओलीलाई सोधेका प्रश्नहरूमा २०७४ सालमा वाम गठबन्धनसँग झण्डै दुई तिहाइ बहुमत हुँदाहुँदै उपेन्द्र यादवलाई सरकारमा किन सहभागी गराइयो ? पार्टीका तर्फबाट वामदेव गौतम नेतृत्वको कार्यदलले दिएको सुझाव किन रद्दीको टोकरीमा फालियो ? स्थायी कमिटीलाई जानकारी नदिई प्रचण्डसँग पालैपालो प्रधानमन्त्री सहमति किन गरियो ? लगायत छन् ।
प्रधानमन्त्री हुने भएपछि जनताको बहुदलीय जनवादलाई तिलाञ्जलि दिएको होइन ? प्रचण्डसँग आधाआधा प्रधानमन्त्री हुने गोप्य ५ बुँदे सहमति गरेर पार्टीभित्र कलहको बीजारोपण किन गरियो ? २०७५ सालमा सुरक्षा परिषद्सम्बन्धी विधेयकमा प्रधानमन्त्रीले सेना परिचालन गर्न सक्ने प्रावधान राखेर तानाशाह बन्ने कुआकांक्षा राखेको होइन ? ‘एसियाको नयाँ देश स्वतन्त्र मधेश’ भन्ने सीके राउतसँग प्रधानमन्त्रीले सम्झौता गर्नु उचित थियो ? भन्ने प्रश्न पनि सोधेका छन् ।
असमान र अपमानजनक गोर्खा भर्ती बन्द गर्नुका साटो नेपाली युवतीहरूलाई भर्ती जान दिने किन ? सवारी साधनमा अंग्रेजी भाषामा नम्बर प्लेट राख्ने निर्णय कसको स्वार्थमा गरियो ? व्यवसायमा विदेशी लगानी आउन नहुने पार्टी नीतिविरुद्ध तपाईं किन ? भन्ने प्रश्न पनि ओलीलाई सोधिएको छ ।
एमसीसी अध्ययन गर्न पार्टीले बनाएको कार्यदलको प्रतिवेदन किन कार्यान्वयन भएन ? एमसीसी पारित भइरहँदा संसद्मा कथित नाराबाजी नाटक किन ? लगायतका प्रश्न पनि ओलीलाई सोधिएको छ ।
एमालेबाट निष्कासन गरिएपछि रावल नयाँ पार्टी खोल्ने तयारीमा रहेका उनका निकटस्थहरूले बताउँदै आएका छन् । तर, देश दौडाहपछि मात्र त्यसको निर्णय गर्ने सोचमा रावल छन् ।
.jpg)
