काठमाडौं : एमालले केन्द्रीय कमिटीको बैठकमा प्रस्तुत हुने राजनीतिक प्रतिवेदनमाथि छलफल गरेको छ ।
बिहीबार बसेको सचिवालय बैठकमा पुस २१ र २२ गते बस्ने केन्द्रीय कमिटीमा छलफल हुने विषय वस्तु समेटेर तयार पारिएको राजनीतिक प्रतिवेदनमाथि छलफल भएको हो ।
प्रतिवेदनमा मुलुकको पछिल्लो राजनीतिक अवस्था, सरकारका कामकारवाही, अन्तर्राष्ट्रिय परिस्थितिलगायत विषय समेटिएको छ ।
एमाले र कांग्रेस मिलेर बनेको सरकार र त्यसको औचित्यबारे समेत राजनीतिक प्रतिवेदनमा उल्लेख छ ।
बैठकपछि एमाले उपमहासचिव प्रदीप ज्ञवालीले केन्द्रीय कमिटीमा छलफल हुने विषय वस्तुका बारेमा छलफल भएको जानकारी दिए ।
सरकार बनिसकेपछि आएको अर्थतन्त्रमा सुधार, विकास निर्माणका कामहरूसमेत प्रतिवेदनमा समेटिएका छन् । प्रतिवेदनमा पछिल्लो समय समाजमा बढिरहेको अराजकता र त्यसको निराकरणको उपायहरू समेत समावेश गरिएको छ ।
बैठकपछि ज्ञवालीले एमाले र कांग्रेस सरकार बनेपछि मुलुकमा स्थिरता आएको र मुलुकको अर्थतन्त्रले समेत लय लिएको दावी गरे । बीआरआई समेत एमाले र कांग्रेसको सहमतिमा हस्ताक्षर भएको उनले बताए ।
