सुर्खेत : कर्णाली उत्सव सोमबारदेखि सुरु हुँदैछ । उत्सव ३ दिनसम्म चल्ने छ ।

यो उत्सवको छैटौँ संस्करण हो । उत्सवका लागि सम्पूर्ण तयारी भइसकेको आयोजक संस्था ऋति फाउन्डेसनले आइतबार पत्रकार सम्मेलन गरी जानकारी गराएको छ । 

‘कुडा कर्नालीका’ नारा दिई सञ्चालन हुने उत्सवमा कर्णालीलाई चिन्ने र चिनाउने उद्देश्यका साथ सञ्चालन गरिएको छ । कर्णाली उत्सवका संयोजक कमल लम्सालले कुराकानीकै माध्यमबाट कर्णालीको पहिचान र सम्भावना केलाउन उत्सवका माध्यमबाट प्रयास थालिएको बताए । 

‘परम्परागत रूपमा हुने कचहरी वा बैठककै आधुनिक रूप हो, कर्णाली उत्सव,’ उनले भने, ‘उत्सवको माध्यमबाट हामीले कर्णालीमा सार्वजनिक बहसको शृङ्खला थालनी गरेका हौँ ।’

बहसमा मूलतः कर्णालीलाई केलाउने गरिन्छ । साथै समृद्ध कर्णाली निर्माणका लागि नीति निर्मातालाई सुझाव दिइने बहसका रूपमा पनि लिइएको उनको भनाइ छ । 

‘कर्णाली उत्सवको मुख्य उपलब्धि भनेकै कर्णालीलाई चिन्ने र चिनाउने सार्थक प्रयास हो,’ लम्सालले भने, ‘विभिन्न संस्करणमा भाग लिएका वक्ता, सञ्चालक तथा सहभागीहरूले उत्सवको महत्वलाई बुझ्दै जानु हो । यसले हाम्रो समाजमा खुला र लोकतान्त्रिक बहसलाई संस्कारको रूपमा विकास गर्न सघाउँछ ।’

आयोजक संस्थाका अनुसार यो पटक १३ वटा सत्र, तीन वटा कर्णाली कन्सर्ट, तीन वटा विद्धत् प्रवचन रहने छन् । त्यसका लागि देशभरबाट राजनीतिज्ञ, पत्रकार, साहित्यकारहरु वीरेन्द्रनगरमा आउने छन् ।